Ադրբեջանն օգտվում է Հայաստանի այսօրվա իշխանության՝ հայ հասարակության հետ չաշխատելու բացթողումից
ՔԱՂԱՔԱԿԱՆՈՒԹՅՈՒՆ
Վերջին շրջանում ադրբեջանական ամբողջ քարոզչական դաշտը միջանցքի տրամաբանությանն է ուղղված։ Դեկտեմբերի 15-ին էլ Բրյուսելում կայանալու է Փաշինյան-Ալիև հանդիպումը։
Այս թեմայիով զրուցել ենք ադրբեջանագետ Գառնիկ Դավթյանի հետ։
Անդրադառնալով ադրբեջանական քարոզչամեքենային` ադրբեջանագետն ասաց․ « Նախ և առաջ Ադրբեջանի սադրանքները պետք է դիտարկել դեկտեմբերի 15-ին Բրյուսելում կայանալիք Փաշինյան-Ալիև հանդիպման համատեքստում: Երկրորդ, այո՛ վերջին շրջանում հատկապես ադրբեջանական ամբողջ քարոզչական դաշտը միջանցքի տրամաբանությանն է ուղղված: Չնայած այն բանին, որ փաստաթղթի ամրագրմամբ որևէ տեղ չկա միջանցք արտահայտությունը, դրանից առաջ էլ տարբեր հարթակներից հերքվում էր դա, բայց փաստը մնում է այն, որ Ադրբեջանն օգտվում է Հայաստանի այսօրվա իշխանության՝ հայ հասարակության հետ չաշխատելու բացթողումից, և այդ քարոզչական թեզն աշխատեցնում է: Ես ավելի հակված եմ Բրյուսելի հանդիպումը կապել հումանիտար հարցերի հետ՝ գերիների հարցի քննարկում, ականապատ տարածքների քարտեզների հանձնում Ադրբեջանին և այլն»։
Անդրադառնալով գերիների մասին մեր իշխանությունների հայտարարություններին` ադրբեջանագետն ասաց․ «Գերիների վերաբերյալ ՀՀ իշխանությունների վերջին շրջանի հայտարարություններն ու գործողություններն օվերտոնի պատուհանի տրամաբանության ներքո են։ Դրանք մի քանի ուղղությամբ են աշխատում: Առաջինը այն է, որ Հայաստանի հասարակության մեջ խորացնում են հակառուսական տրամադրություններ, երկրորդ՝ Հայաստանի հասարակությանը շարունակում են բաժանել սևեր-սպիտակների, այդ տրամաբանությամբ տանելով դիսկուրս՝ գերիները հերո՞ս են, թե՞ դավաճան: Լավ գիտենք, որ ՀՀ-ում կան հակառուսական շրջանակներ, որոնք հատուկ թիրախներով են աշխատում: Երկրորդ ուղղությունն այն է, որ գերիների հարցով ռուսական կողմը շատ ակտիվ է զբաղվում, և դանդաղ տեմպերի մեղքը նաև ՀՀ իշխանություններինն է: Բոլորովին վերջերս, երբ ՀՀ իշխանությունների կողմից կար գերիներին դավաճան համարելու քարոզը, Ադրբեջանը լայն տարածում էր հետևյալ թեզը՝ քանի որ Ադրբեջանը մինչև այս չէր տալիս գերիներին՝ պատճառաբանելով, որ նրանք ահաբեկիչներ են, հատել են Հայաստան-Ադրբեջան սահմանը, թեպետ այդտեղ սահման հասկացություն չկա, և այս ամբողջ տրամաբանության ներքո նշում էին, որ քանի որ ՀՀ իշխանություններն ասում են, թե գերիներին դատելու են, կա գերիների կյանքի անվտանգության խնդիր, և ճիշտ կլինի, որ գերիներին չտան և երրորդ երկիր ուղարկեն: Ասում են, որ գերիները ոչ թե պետք է գնան Հայաստան, այլ երրորդ երկիր՝ նշելով, որ սա լավ առիթ է Ադրբեջանի համար, որ գերիներին երկար ժամանակ չվերադարձնեն: Ադրբեջանական կողմն օգտվելով ՀՀ իշխանությունների հայտարարությունից նման հայտարարություններ են անում»:
