Ստորագրահավաք կիևյան ձևով. Ուկրաինան աչքի է ընկել Հայաստանին պատժելու «արագացված տեմպերով»
ՔԱՂԱՔԱԿԱՆՈՒԹՅՈՒՆ
eadaily.com-ը գրում է, որ մի շարք պետությունների, այդ թվում՝ Հայաստանի և Բելառուսի դեմ «ոլորտային պատժամիջոցների» կիրառման վերաբերյալ ստորագրահավաք Ուկրաինայի նախագահի պաշտոնական կայքում հայտնվելուց գրեթե երեք ամիս անց հավաքվել է 500-ից մի փոքր ավելի ձայն: Բանն այն է, որ այդ երկրները ՄԱԿ-ի Գլխավոր ասամբլեայի 76-րդ նստաշրջանում հերթական անգամ քվեարկել են «ընդդեմ Ուկրաինայի տարածքային ամբողջականության»։
«Պատժիչ ակցիայի» կազմակերպիչները ծրագրել էին, որ սեպտեմբերի 14-ին մեկնարկած ստորագրահավաքը կտևի 92 օր և կհավաքի 25 հազար դրական արձագանք, որպեսզի դրան օրինագծի տեսք տրվի։ Սակայն դեկտեմբերի 6-ի դրությամբ՝ ստորագրահավաքի 83-րդ օրը և վերջնաժամկետից 9 օր առաջ, հաջողվել է հավաքագրել ընդամենը 510 կողմնակից (25 հազար ձայնի «քվորումի» երկու տոկոսը)։
Ստորագրահավաքի նախաձեռնողներից մեկը՝ Տեղեկատվական դիմադրության խմբի համակարգող, Ուկրաինայի Անվտանգության հետազոտությունների ինստիտուտի առաջատար մասնագետ Ալեքսանդր Կովալենկոն ավելի վաղ վստահեցրել էր, որ այդ ստորագրահավաքի քվեարկությունն ընթանում է «արագացված տեմպերով»։
Առաջարկվում էր ուկրաինական «ոլորտային պատժամիջոցներ» կիրառել Հայաստանի, Բելառուսի, Կուբայի, Հյուսիսային Կորեայի, Իրանի, Ղազախստանի, Նիկարագուայի, Ֆիլիպինների, Սիրիայի և Զիմբաբվեի նկատմամբ։ Այս երկրները կոչվում են Ռուսաստանի «բարեկամների ակումբ»։ Խնդրագրի տեքստում նշվում է նաև, որ «Ուկրաինայում իր սփյուռքի շնորհիվ է, որ Հայաստանը բյուջեի եկամուտներ է ստանում, իսկ Բելառուսը դրական առևտրային հաշվեկշիռ ունի միայն Ուկրաինայի հետ։ Բայց այդ երկրները շարունակում են խստորեն աջակցել Ռուսաստանին»։
Հիշեցնենք, որ Հայաստանը հետևողականորեն չի աջակցում Ղրիմի վերաբերյալ ՄԱԿ-ի հակառուսական բանաձևերին։ Այսպիսով, 2018 թվականի դեկտեմբերին Երևանը դեմ է քվեարկել «Ղրիմի ռազմականացման խնդրի մասին» փաստաթղթին։ Այս տարվա սեպտեմբերին ՄԱԿ-ի Գլխավոր ասամբլեայի 76-րդ նստաշրջանի օրակարգում «Ուկրաինայի ժամանակավոր օկուպացված տարածքներում իրավիճակի մասին» կետը ներառելու քվեարկության ժամանակ Ադրբեջանը կողմ է քվեարկել նման ընդգրկմանը, իսկ Հայաստանը դեմ։
Նյութը հրապարակման պատրաստեց Կամո Խաչիկյանը
