Ադրբեջանը հետևողականորեն ահաբեկում է Արցախի բնակիչներին

Ադրբեջանը շարունակում է ահաբեկել Արցախի հայ բնակչությանը, իսկ Հայաստանի իշխանությունները հերթապահ հայտարարություններից բացի ոչինչ չեն ձեռնարկում։ Ադրբեջանի զինվորականները բռնություն են գործադրել ու սպանել Ճարտարի բնակչին: Արցախի ազգային անվտանգության ծառայության փոխանցմամբ՝ երեկ կեսօրից հետո ադրբեջանցի զինվորականները մուտք են գործել Մարտունու շրջանի Ճարտար քաղաքի վարչական տարածքի հարևանությամբ տեղակայված չեզոք գոտի և բռնություն գործադրել անասնապահությամբ զբաղվող 65-ամյա Սեյրան Սարգսյանի նկատմամբ, հետո նրան տեղափոխել են ադրբեջանական հենակետ, որտեղ Սարգսյանին դիտավորությամբ կյանքից զրկել են։ Տեղեկությունը հաստատել է նաև Արցախի մարդու իրավունքների պաշտպանը։ Գեղամ Ստեփանյանի գնահատմամբ՝ «սպանությունը Ադրբեջանի հանցավոր և ահաբեկչական գործողությունների, ինչպես նաև հայերի նկատմամբ լայնածավալ և համակարգային հետապնդման քաղաքականության դրսևորում է»։

Վերջին երեք ամսվա ընթացքում Արցախում քաղաքացիական երեք անձ է սպանվել ադրբեջանցիների ձեռքով։ Այս սադրանքները հստակ քաղաքականություն են Ադրբեջանի կողմից՝ միտված ահաբեկելու Արցախի բնակչությանը, ստիպելու, որ լքեն իրենց հայրենիքը և հեռանալու։ Ադրբեջանի իշխանություններն ամեն ինչ արել և անելու են Արցախը հայաթափելու ուղղությամբ։ Փոխարենը, Արցախի բնակչության կյանքն ու իրավունքները պաշտպանելու ուղղությամբ ոչինչ չեն ձեռնարկում Հայաստանի գործող իշխանությունները, ընդհակառակը, հետևողական ներարկում են հանրության մեջ զոհի գաղափարը, նպաստում են Արցախի և ՀՀ սահմանամերձ դարձած բնակավայրերի բնակիչների հոգեբանական ճնշվածությանը, ամեն ինչ անում, որ մարդիկ, հանուն իրենց և իրենց երեխաների կյանքը պահպանելու, հեռանան հայրենի բնօրրանից։ Եվ սա է ամենամեծ դավաճանությունն ու թշնամությունը Հայաստանի բնակչության նկատմամբ։

Գագիկ Զաքարյան