Երեք երկրների փոխվարչապետները սկսել են քննարկումները․ ի՞նչ փաստաթուղթ է ստորագրվելու

Հայաստանի, Ադրբեջանի և Ռուսաստանի փոխվարչապետները երեկ Մոսկվայում սկսել են աշխատանքային հանդիպումը, որի արդյունքների մասին առայժմ տեղեկություներ չկան։ Անցած շաբաթ բանակցությունների վերսկսման մասին հայտնել էր ՌԴ նախագահ Վլադիմիր Պուտինը՝ Ալիևի և Փաշինյանի հետ հանդիպումից հետո։ Նոյեմբերի 26-ին ստորագրված հայտարարությունը չէր մանրամասնում, թե որտեղով են անցնելու ավտոմոբիլային և երկաթուղային ճանապարհները, և ովքե՞ր ու ինչպե՞ս են վերահսկելու այդ ճանապարհները։ Եռակողմ այդ հանդիպումից հետո Ռուսաստանի նախագահը հայտարարել էր, որ կողմերը համաձայնության են եկել երեք կետի շուրջ։

Առաջինը՝ պայմանավորվել են մինչև տարեվերջ ստեղծել սահմանազատման և սահմանագծման գործընթացի մեկնարկի համար անհրաժեշտ մեխանիզմներ։ Բացի այդ, ըստ Պուտինի, հաջողվել է առաջ շարժվել հումանիտար հարցերի շուրջ։ Ինչի մասին է խոսքը՝ հայտնի չէ։ Եվ երրորդ հարցը, որի շուրջ, Պուտինի խոսքով, հաջողվել է պայմանավորվել, ճանապարհների ու տրանսպորտային կապերի ապաշրջափակումն է։

Պաշտոնական Երևանը շարունակում է պնդել, որ միջանցքային տրամաբանությամբ որևէ համաձայնություն չի լինելու։ Ադրբեջանի նախագահը ևս «միջանցք» բառը Սոչիում չէր օգտագործել՝ թե՛ եռակողմ բանակցություններին, թե՛ Պուտինի հետ երկկողմ հանդիպմանը։

Նախօրեին էլ փոխվարչապետ Մհեր Գրիգորյանը հայտարարել էր, թե տարածաշրջանում որևէ ապաշրջափակման պարագայում երկաթգծի ու ավտոմոբիլային ճանապարհները մնալու են Հայաստանի իրավազորության ներքո: Ռուս վերլուծաբանները կարծում են, թե Բրյուսելում երկու շաբաթից կայանալիք Ալիև-Փաշինյան հանդիպումից առաջ կողմերը արդեն կունենան ստորագրված պայմանավորվածություններ։ Հայ հանրությունը շունչը պահած է սպասում փոխվարչապետների հանդիպման արդյունքներին, դրանից է կախված Սյունիքի ապագան։ Մինչդեռ Սյունիքում այս օրերին սկիզբ առած հետապնդումները, ընդդիմադիր գործիչների կալանավորումները, գործող դավադիր իշխանության վարքը ստիպում են մտածել, որ հերթական հակահայ հայտարարությունն է վերջին պահին հրամցվելու Հայաստանի Հանրապետությանը։

Արամ Ավանեսյան