Փաշինյանական վնասարարություն․ ընդդիմության ցանկացած առաջարկ մերժվում է իշխանության կողմից

Ազգային ժողովի պաշտպանության և անվտանգության հարցերի հանձնաժողովը երեկ կայացած նիստում հրաժարվել է հավանություն տալ ընդդիմադիր պատգամավոր Թագուհի Թովմասյանի ներկայացրած օրինագծին, որով զինծառայողներին հնարավորություն էր տրվելու առանց հերթի՝ հրատապ կարգով, բուժսպասարկում անցնել։ Թվում էր՝ իշխանական պատգամավորներն իրենք պետք է շահագրգիռ լինեն այս օրենքն ընդունելու, զինծառայողների սպասարկումը բարելավելու, այդ եղանակով զինվորականների դերի բարձրացման, նրանց խնդիրների լուծման հարցերը լուծելու մեջ։ Առավել ևս, որ պատգամավորի առաջարկը որևէ լրացուցիչ բեռ չի հանդիսանալու բյուջեի համար, և բացառապես օգտակար է լինելու քաղաքական իշխանության քարոզչության համար։ Մինչդեռ, իշխանական պատգամավորները՝ Անդրանիկ Քոչարյանի գլխավորությամբ, ամեն ինչ արեցին նախագիծը քննադատելու, մանիպուլացնելու, ընդդիմությանն անհեթեթ մեղադրանքներ հասցեագրելու, և, վերջնարդյունքում, նախագծին դեմ արտահայտվելու համար։

Տպավորություն է, թե «Քաղաքացիական պայմանագիրը» դեմ է ցանկացած ողջամիտ առաջարկի, եթե այդ առաջարկը հնչում է ընդդիմության կողմից։ ԱԺ պատգամավոր Տիգրան Աբրահամյանի կարծիքով, գործընկերոջ ներկայացրած նախագիծը և՛ բխում է զինվորական մասնագիտության գրավչության բարձրացումից, և՛ զինծառայողների՝ առանց այդ էլ գերծանր գրաֆիկը, մի մեծ հոգսով թեթևացնելու մոտեցումից։

«Ի վերջո, մենք այսքան խոսում են զինվորականի դերի բարձրացման, հասարակության շրջանում նրանց հատուկ դերի հատկացման և առհասարակ, նրանց պարտական լինելու մասին, սակայն երբ գործը հասնում է իրական քայլեր ձեռնարկելու մասին, իշխանությունը հազար պատճառ է հնարում, որ նույնիսկ ֆինանսական բեռ չպարունակող այս նախաձեռնությունը տապալի։ Թվում է, թե որոշ հարցեր նույնիսկ առանց հարցուպատասխանի պետք է ընդունվեն, բայց պարզվում է, որ ոչ։ Դե այս իշխանության պայմաններում զարմանալի բան չկա, զուտ արձանագրելու համար։ Անկախ իշխանության դիմադրությունից, ես ինքս ամեն ինչ անելու եմ զինվորականների դերի բարձրացման, նրանց հետ առնչվող խնդիրների թեթևացման և սատարման համար»,-  ֆեյսբուքյան իր էջում գրել է ընդդիմադիր պատգամավորը։

Ֆելիքս Սահակյան