Թույլատրե՞լ, թե՞ ոչ թուրքական ապրանքների ներկրումը․ ՔՊ-ում իրար են ուտում

Տարվա վերջին օրը կլրանա մեկ տարին՝ ինչ արգելվում է թուրքական ծագման ապրանքների ներկրումը Հայաստան։ Իհարկե, ներկրողները շարունակել են զարտուղի ճանապարհներով կամ, ինչն ավելի վատ է, գործող իշխանության թողտվության պայմաններում թուրքական ապրանքներ ներկրել։ Այժմ էլ կառավարությունը դեռ վերջնական որոշում չունի՝ թույլատրե՞լ թուրքական ապրանքների ներկրումը, թե՞ շարունակել արգելքը։ Իշխող «Քաղաքացիական պայմանագրում» էլ չեն կարողանում կողմնորոշվել՝ ի՞նչ անել։

Էկոնոմիկայի նախարարությունը պնդում է, որ հարկավոր է ևս վեց ամսով երկարաձգել արգելքը, պատգամավորների և պաշտոնյաների մի մեծ խումբ էլ ցանկանում է թույլատրել ներկրումը․ որևէ կողմը այդպես էլ չի կարողանում հստակ, ողջամիտ բացատրել, թե արգելքը կամ թույլատրությունն ինչ տնտեսական հետևանքներ կունենա Հայաստանի համար։ ԱԺ տնտեսական հարցերի հանձնաժողովի փոխնախագահ Բաբկեն Թունյանն, օրինակ, էկոնոմիկայի նախարարությանը մեղադրում է թուրքական ապրանքների արգելքի ազդեցության մասին վերլուծություն չունենալու մեջ։ Բնականաբար, իրեն հարգող պետական գերատեսչությունը վաղուց պետք է նման փաստաթուղթ պատրաստեր, սակայն Վահան Քերոբյանի աշխատակազմը, ըստ էության, զբաղված է վիճակագրական տվյալներ կեղծելով, ժամանակ չի ունեցել վերլուծություն պատրաստելու համար։ Քերոբյանն օրերս ասել է, թե իրենք ամեն ինչ անում են, որ թուրքական ապրանքների ներմուծումը չթույլատրվի: Իսկ նրա տեղակալ Արշակ Ասլանյանն էլ նշել է, որ էկոնոմիկայի նախարարությունը կառավարությանն առաջարկել է դեկտեմբերի 31-ից հետո կրկին երկարաձգել թուրքական ծագման վերջնական սպառման ապրանքների՝ Հայաստան ներկրման արգելքի գործողության ժամկետը:

Բաբկեն Թունյանը հակադարձում է՝ որոշումն ընդունելու է կառավարությունը, ոչ թե էկոնոմիկայի նախարարությունը: «Նախարարությունն առաջարկել է, իսկ առաջարկը կարող է ընդունվել կամ չընդունվել: Հաշվի առնելով ոչ միայն տնտեսական, այլ նաև այլ գործոններ»,- ասել է Թունյանը: Սա նշանակում է, որ կառավարությունը որոշումը կայացնելու է բացառապես քաղաքական հանգամանքներից ելնելով։ Թերևս, հաշվի առնելով փաշինյանական իշխանության ապիկարությունն ու թուլությունը՝ կասկած չկա, որ կառավարությունը որոշում կկայացնի թույլատրել թուրքական ապրանքների ներկրումը։ Փաշինյանը Թուրքիայի այլ պահանջներ էլ կկատարի, միայն թե դա հնարավորություն տա մնալ իշխանության ղեկին։

Արմեն Ղուկասյան