Պատրա՞ստ է արդյոք Հայաստանը կորոնավիրուսի նոր ալիքին

Առողջապահության համաշխարհային կազմակերպությունը հայտարարել է նոր և ավելի վտանգավոր սպառնալիքի մասին։ ԱՀԿ նախնական տվյալները վկայում են, որ ավելի վաղ «Քովիդ-19»-ով վարակված մարդկանց մոտ կարող է բարձր լինել կորոնավիրուսի նոր՝ «օմիկրոն» հիմնամանրէով վարակվելու վտանգը:

ԱՀԿ-ն ավելի վաղ հայտնել էր, որ վիրուսի «օմիկրոն» տեսակը բավարար ուսումնասիրված չէ, և դեռ վաղ է եզրակացություններ անել այն մասին, թե այն կարող է առավել վտանգավոր լինել, քան «դելտա» հիմնամանրէն: Նշենք, որ նոր տեսակը հայտնաբերվել է Աֆրիկայի հարավային հատվածի երկրներում և արագորեն սկսել է տարածվել: Նոր հիմնամանրէով վարակման դեպքեր են հայտնաբերվել Իսրայելում և Գերմանիայում: Նոր հիմնամանրէի տարածումը կանխելու նպատակով Եվրոպայի երկրները սահմանափակել են ավիահաղորդակցությունն աֆրիկյան երկրների հետ:

Կորոնավիրուսն արդեն Հայաստանում գրեթե 9 հազար մարդու կյանք է խլել․ 7535 մահվան դեպք կորոնավիրուսից և 1440 մահ՝ ուղեկցող հիվանդությունների պատճառով։ Պատրա՞ստ է արդյոք Հայաստանը նոր և վտանգավոր «օմիկրոն» տեսակին։ Գործող իշխանությունները ձախողել են կորոնավիրուսի դեմ պայքարը, իսկ պատվաստումների առումով Հայաստանը հետ է մնում ոչ միայն իր հարևաններից, այլև աշխարհի տասնյակ երկրներից։ Երկու դեղաչափ Հայաստանում ստացել է բնակչության 15 տոկոսը, ինչը չափազանց ցածր ցուցանիշ է։ Ըստ էության, վիրուսի «օմիկրոն» տեսակի հայտնվելը լրջագույն վտանգներ է պարունակում, իսկ Նիկոլ Փաշինյանի վարչախումբը, առողջապահության հետ կապ չունեցող և ապիկար առողջապահության նախարարը, համապատասխան կառույցները որևէ գործուն քայլ չեն կատարել բնակչությանը կորոնավիրուսից պաշտպանելու ուղղությամբ։

Արթուր Մարտիրոսյան