Այսօր Սոչիում կհանդիպեն Փաշինյանը, Պուտինն ու Ալիևը․ ի՞նչ սպասել

Այսօր Սոչիում կհանդիպեն Հայաստանի, Ադրբեջանի ու Ռուսաստանի ղեկավարները։ Այս տարվա ընթացքում սա Փաշինյանի և Ալիևի երկրորդ դեմ առ դեմ հանդիպումը կլինի, առաջինը հունվարի 11-ին էր՝ Մոսկվայում, կրկին Պուտինի մասնակցությամբ։

Ռուսական կողմի հաղորդմամբ՝ նախատեսվում է քննարկել նոյեմբերի 9-ին և հունվարի 11-ին ձեռք բերված պայմանավորվածությունների կատարման ընթացքը, ինչպես նաև նախանշել հետագա քայլերը՝ տարածաշրջանում կայունության ամրապնդման, խաղաղ կյանքի հաստատման համար։ Մեկ շաբաթ առաջ Եվրոպայի խորհրդի նախագահ Շառլ Միշելը Twitter-ի իր էջով հայտնել էր, որ նախատեսվում է Փաշինյան-Ալիև հանդիպում՝ դեկտեմբերի 15-ին Բրյուսելում նախանշված ԵՄ Արևելյան գործընկերության գագաթնաժողովի շրջանակներում, սակայն Ռուսաստանը որոշեց չկորցնել նախաձեռնությունը և պարտադրեց եռակողմ հանդիպում անցկացնել ավելի վաղ, իր տարածքում։

Հաղորդվում էր, թե հանդիպումը կայանալու է նոյեմբերի 9-ին՝ 44-օրյա պատերազմում Հայաստանի պարտության արձանագրման օրը։ Հայկական կողմը հերքում էր այս տեղեկությունը, սակայն նոյեմբերի 23-ին լրագրողների հարցերին պատասխանելիս՝ Փաշինյանը հաստատեց, որ եղել է նոյեմբերի 9-ին առցանց հանդիպում անցկացնելու գաղափար։ «Ես ասել եմ, որ այդ հանդիպման գաղափարը քննարկելի է և խնդրահարույց է։ Ես անկեղծ ասել եմ, որ նոյեմբերի 9-ը դժվար, ծանր և դառը օր է մեզ համար, բայց եթե պարզվի, որ այդ հանդիպման արդյունքներով մենք կկարողանանք համաձայնել կոնկրետ արդյունքի շուրջ, օրինակ՝ կկարողանանք լուծել գերիների հարցը, ես պատրաստ եմ այդ դառնությունը վերցնել և մասնակցել այդ օնլայն հանդիպմանը»,- ասել էր Փաշինյանը։

Մինչ այս պահը հստակ որևէ տեղեկություն չկա, թե ինչ են քննարկելու կամ ստորագրելու երեք երկրների ղեկավարները։ Իշխանությունը գաղտնի է պահում յուրաքանչյուր մանրամասն։ Չի բացառվում, որ նույնիսկ Փաշինյանն ինքը տեղյակ չէ, թե ինչ փաստաթուղթ են իրեն պարտադրելու։ Հանրությունը, սակայն, ծանր սպասումներ ունի։ Հանուն իր իշխանության պահպանման Նիկոլ Փաշինյանը պատրաստ է ամենախելահեղ դավաճանական արարքներին, և հենց սա է վհատեցնում ՀՀ քաղաքացիներին, որոնց համար «հեղափոխական» գաղափարներով իշխանության եկած ուժը դարձել է անկանխատեսելի և վտանգավոր։

Գարիկ Կարապետյան