Թուրքիայի տնտեսությունը չի կարողանում սպասարկել իր արկածախնդիր առաջնորդի քաղաքականությունը
ՔԱՂԱՔԱԿԱՆՈՒԹՅՈՒՆ
Թուրքիայի ազգային արժույթն արժեզրկվում է, փողոցում բողոքի ակցիաներ են։
Այս թեմայով զրուցել ենք արևելագետ Արմեն Պետրոսյանի հետ։
Հարցին, թե ինչի՞ հետևանք է այս ամենը. «Սա հետևանք է մի կողմից Թուրքիայում ստեղծված օբյեկտիվ տնտեսական խնդիրների, որոնք պայմանավորված են մի շարք հանգամանքներով, ինչպես, օրինակ Թուրքիայի արտաքին քաղաքականությամբ, տարբեր հակամարտություններում ակտիվ դերակատարմամբ, իսկ դա Թուրքիայի բյուջեի համար մեծ ծախսեր է ենթադրում։ Հաջորդ պատճառը համավարակն է, որի ազդեցությունը մի քանի ոլորտների, մասնավորապես, զբոսաշրջության վրա նկատելի է եղել։ Մյուս կարևորագույն պատճառը Թուրքիայի իշխանության վարած արկածախնդիր քաղաքականությունն է, նաև տնտեսական, որի նպատակն է լիրան արժեզրկելու միջոցով երկրում ներդրումներն ու արտահանումը խթանել։ Սա էլ հանգեցրել է որոշակի առումով տնտեսական ու քաղաքական ճգնաժամի։ Այս ամենով էլ պայմանավորված՝ Թուրքիայում փաստացի շրջանառվում է արտահերթ ընտրությունների թեման։ Ամփոփելով ասեմ, որ այս ճգնաժամի պատճառն այն է, որ Թուրքիայի տնտեսությունը չի կարողանում սպասարկել իր արկածախնդիր առաջնորդի քաղաքականությունը»։
Հարցին, թե Թուրքիայից եկող ի՞նչ դրական ազդակների մասին է ասում Հայաստանի իշխանությունը` արևելագետն ասաց. «Այդ խոսույթն ու գնահատականը հիմնականում դիվանագիտական մոտեցման տրամաբանության մեջ են։ Իշխանություններն օգտագործում են որոշակի գնահատականներ՝ Թուրքիայի հետ հարաբերությունների կարգավորման դրական մթնոլորտ ստեղծելու համար: Բայց, կրկնում եմ, սա պարզապես միջոց է Թուրքիայի հետ կոնկրետ հարաբերությունների կարգավորման կամ գործընթացին մեկնարկ տալու համար: Իսկ արդյունավետությունը, բնականաբար, շատ ցածր է, որովհետև Թուրքիան ու Ադրբեջանն այսօր շատ սերտ հարաբերությունների մեջ են, ու դժվար թե Թուրքիան այդ ամենը փչացնի՝ Հայաստանի հետ դիվանագիտական հարաբերություններ սկսելու համար»։
Սոնա Գիշյան
