Իրանը թույլ չի տա սահմանների փոփոխություն իր հյուսիսային շրջանների մոտ
ՔԱՂԱՔԱԿԱՆՈՒԹՅՈՒՆ
Հայաստանի արեւելյան սահմանագոտում մարտական գործողությունների կապակցությամբ տարբեր երկրներ և միջազգային կառույցներ հանդես եկան հայտարարություններով:
Այս թեմայով զրուցել ենք իրանագետ Արմեն Վարդանյանի հետ։
Հարցին, թե իրանագետն ի՞նչ կարծիք ունի հարևան Իրանի հայտարարության վերաբերյալ` Արմեն Վարդանյանը ասաց․ «Կարծում եմ, որ ընդհանրապես սահմանային միջադեպերի հետ կապված Իրանի հայտարարությունները երբեք էլ այդքան սուր չեն եղել: Իրանի հայտարարությունները սուր են եղել միայն այն ժամանակ, երբ լուրջ վտանգ է առաջացել, որ Ադրբեջանն ու Թուրքիան կարող են Հայաստանի տարածքի հարավը կտրեն և ուժով միջանցք բացեն: Իսկ այլ պարագաներում չեմ հիշում մի դեպք, երբ Իրանը շատ սուր ու կոշտ հայտարարություններով հանդես գա: Նրանք մշտապես ընդամենը կոչ են անում հարցերը լուծել խաղաղ ճանապարհով և կոշտ հռետորաբանություն նման դեպքերում չեն դրսևորում»:
Անդրադառնալով այն հարցին, թե արդյո՞ք Իրանի անհանգստությունները պայմանավորված են միայն միջանցքով, քանի որ Ռուսաստանի և Իրանի ղեկավարներն են հեռախոսազրույց ունեցել ու քննարկել այդ հարցը` իրանագետն ասաց․ «Այո, Իրանի անհանգստությունները վերջին ժամանակներս կապված են հենց միջանցքի հետ: Նաև իրանական մամուլում տեղեկատվություն եղավ, որ իրանական հետախուզությունն է այս տարվա մայիսի 12-ին տվյալներ ստացել, որ Ադրբեջանը փորձում է ուժով բացել իր համար այդքան բաղձալի միջանցքը: Այդ ժամանակ էլի իրանական արձագանքները ավելի կոշտ էին: Իրանը հայտարարեց, որ այս տարածաշրջանում սահմանների փոփոխություն չի հանդուրժելու: Կարծում եմ՝ այդ ուղղությամբ նաև Իրանն է որոշակի աշխատանքներ կատարում, գոնե դիվանագիտական մակարդակում մենք տեսնում ենք, որ այս հարցը բարձրացվում է Ռուսաստանի մոտ, հնարավոր է՝ նաև Թուրքիայի և Ադրբեջանի հետ հանդիպումներում: Համենայնդեպս, մենք պաշտոնական հաղորդագրություններում տեսնում ենք, որ Իրանն այս հարցը անընդհատ առաջ է քաշում, որ թույլ չի տա սահմանների փոփոխություն իր հյուսիսային շրջանների մոտ»:
Սոնա Գիշյան
