Սամվել Բաբայանը գցում է պատասխանատվությունը բանակի վրա

Նիկոլ Փաշինյանն ու իր մերձավորները շարունակում են արցախյան 44-օրյա պատերազմում ջախջախիչ պարտության մեղքը բարդել բանակի, ռազմական ղեկավարության, գերիների, նախկին իշխանությունների, բոլորի, բայց ոչ Հայաստանի և Արցախի գործող իշխանությունների վրա։ Արցախի Անվտանգության խորհրդի նախկին քարտուղար Սամվել Բաբայանն է երեկ այցելել Արցախի Ազգային ժողով, մի շարք հայտարարություններ արել։

«Էս պարտությունը վաղուց ա գալիս․ 13 թվին ես նամակ եմ գրել, որ Ադրբեջանը զինվում ա՝ գործարաններ ա կառուցում, նոր զենք ա առնում, ստեղծում ա բանակ․․․, մի հատ կանգ առեք, նստենք, քննարկենք, թե ինչ ճանապարհ ենք ընտրում։ Չե՛նք արել»,- Արցախի Հանրապետության քաղաքական և հասարակական հատվածների ներկայացուցիչների հետ հանդիպման ժամանակ՝ խոսելով հայկական 2 հանրապետություններում և նրանց շուրջ ստեղծված իրավիճակից, ասել է Արցախի անվտանգության խորհրդի նախկին քարտուղար, «Միասնական հայրենիք» կուսակցության նախագահ Սամվել Բաբայանը։

Անդրադառնալով 44-օրյա պատերազմի ժամանակ իր դերակատարությանը, որի շուրջ բազմաթիվ տեղեկություններ են շրջանառվում, Բաբայանն ասել է․ «Վսեգո լիշ, քարտեզի վրա ցույց եմ տվել, թե ոնց կարելի է էդ տարածքն ազատագրել և փակել։ Էն թյուրիմացությունը, թե Բաբայանը որոշեց, Բաբայանն ասեց․ ոչ մի բան չի ասում, որովհետև խորհրդական ես դու, նախագահի կողմից գործուղված՝ էդ խորացված բունկերը, որտեղ ձեր շտաբն ա եղել․․․ խորհուրդ ես տալիս, հետո նախագահին զեկուցում ես իրավիճակը, թե ինչ է կատարվում։ Վե՛րջ։ Քո բոլոր ֆունկցիաները դրանից հետո ավարտված է»,- նշել է Սամվել Բաբայանը։

Հարցին, թե փորձե՞լ է ներկայացվող ռազմավարությունը քննարկել Արցախի նախկին ղեկավարների հետ, Ս․ Բաբայանն արձագանքել է՝ «Նրանք ասելիք չունեն»։

Նույնիսկ Արցախում են տարակուսել Սամվել Բաբայանի այս պահվածքից։ Թերևս, նա ինքն էլ հասկանում է, որ առաջիկայում լուրջ փոփոխություններ են սպասվում, որից հետո իրեն ևս հարցեր են հղելու, թե որտեղ էր, որ բունկերում, ում հետ էր կազմակերպում և ձախողում ռազմական այն գործողությունը, որի վերաբերյալ ամիսներ շարունակ տեղեկություններ էին շրջանառում։ Հիշեցնենք, Հայաստանի գործող իշխանությունները գեներալներին են մեղադրում՝ իբր Լելե-Թեփեի ծրագրված գործողության ձախողման, հարյուրավոր զինվորների մահվան մեջ։ Ըստ Էության, Սամվել Բաբայանը սեփական կաշին փրկելու խնդիր ունի, այսօր էլ փորձում է մեղքը բարդել ուրիշների վրա։ Ինչ-որ պահի, իհարկե, Բաբայանը ստիպված կլինի պատմել Փաշինյանի ու նրա ընտանիքի հետ իր կապերի, ստացած հանձնարարությունների և դրա կատարման վերաբերյալ։ Եվ այդ մոտալուտ հեռանկարը ահաբեկում է Արցախի նախկին «խիզախ» կամանդույուշչուն։

Սարգիս Գաբրիելյան