Նյարդային նախարարը․ Քերոբյանը զայրանում է հրաժարականի մասին հարցերից

Էկոնոմիկայի նախարար Վահան Քերոբյանը սկսում է նյարդայնանալ, հատկապես երբ լրագրողներն իրեն հարցեր են տալիս սահմանների, նաև տնտեսական աճի վերաբերյալ իր նախկինում արված հայտարարությունների վերաբերյալ։ Երեկ՝ կառավարության նիստից հետո կայացած ճեպազրույցում նախարարը չափազանց նյարդային էր, տեղին-անտեղին վիրավորում էր լրագրողներին։ Երբ լրագրողները հետաքրքրվեցին Սյունիքի ճանապարհներից և սպասվող ներդրումներից, Քերոբյանը հանկարծ հիշեց քարտեզները։

«Ըստ քարտեզների՝ այդ ճանապարհները գտնվում են սահմանից այն կողմ: Այդ ճանապարհները, ըստ սահմանների գտնվում են Ադրբեջանի տարածքում»:

Դիտարկմանը՝ դեռևս սահմանազատում տեղի չի ունեցել, որը կհստակեցներ, թե այդ ճանապարհն ում տարածքում է, Վահան Քերոբյանը պատասխանեց, որ վարչապետը շատ մանրամասն պատասխանել է այդ հարցին:

«Ուղիղ մեկ տարի առաջ ես գտնվում էի Հադրութի շրջանի Տումի գյուղի մոտակայքում և դուք հիմա փորձում եք ինձ ասել, որ իմ հայրենասիրությունը կասկածելի՞ է»,-ի պատասխան լրագրողի հարցն՝ թե հայրենասեր հայը կարո՞ղ է ասել, որ հայկական ճանապարհները պատկանում են Ադրբեջանին, Վահան Քերոբյանը ասաց. «Գոյություն ունեն քարտեզներ, դրանցում գոյություն ունեն սահմաններ, և առաջիկա դելիմիտացիան ու դեմարկացիան տեղի են ունենալու այն քարտեզների հիման վրա, որոնք գործել են, օրինակ, 1988-ին»։

Լրագրողները նաև հիշեցրել են իր՝ նախկինում արած հայտարարությունը երկնիշ աճի վերաբերյալ։ Վահան Քերոբյանը, հիշեցնենք, խոստացել էր հրաժարական տալ, եթե մինչև տարեվերջ երկնիշ տնտեսական աճ չապահովվի, մինչդեռ ֆինանսների նախարարը արձանագրել է, որ առավելագույնը կարող է 6,5 տոկոս տնտեսական աճ լինել։

Արդյո՞ք էկոնոմիկայի նախարարը պատրաստվում է կատարել իր խոստումը։ «Ես արդեն տաս անգամ պատասխանել եմ այդ հարցին, իմաստ չեմ տեսնում պատասխանել»,- ասել է Քերոբյանը։ Ավելին, նա պնդել է, թե ֆինանսների նախարարությունը փոքր-ինչ հոռետեսական կանխատեսում է արել՝ առաջարկելով սպասել մինչև տարեվերջ։ Իսկ մինչև տարեվերջ մեկուկես ամիս է մնացել։ Տեսնենք՝ արդյո՞ք էկոնոմիկայի նախարարը կկատարի իր խոստումը, թե՞ նոր պատճառաբանություն կգտնի խուսափելու համար։

Տարոն Գրիգորյան