Դեմարկացիայից և դելիմիտացիայից խուսափել չի հաջողվի․ ՌԴ ՊՆ-ն է խառնվել

Հայաստանի գործող իշխանություններին չի հաջողվելու խուսափել դելիմիտացիայի և դեմարկացիայի գործընթացից։ Միակ բանը, որ դեռ Փաշինյանին հաջողվում է, ՀՀ քաղաքացիներին ապակողմնորոշելն ու մանրամասներ չհայտնելն է։ Երեկ կառավարության նիստում Նիկոլ Փաշինյանը հայտարարել է, թե Ռուսաստանի պաշտպանության նախարարությունը դեմարկացիայի և դելիմիտացիայի նախապատրաստական փուլի վերաբերյալ հանդես է եկել առաջարկություններով։

«Ես ուզում եմ վերահաստատել, որ այդ առաջարկությունները մեզ համար ընդունելի են: Պարոն Պապիկյան, Ռուսաստանի Դաշնության Ձեր գործընկերոջ հետ խնդրում եմ ճշգրտեք մանրամասները և փորձենք իրագործել՝ Ռուսաստանի Դաշնության արած առաջարկների շրջանակում և հիման վրա»,- ասել է Փաշինյանը։

Առնվազն տարօրինակ կարող է թվալ, որ առաջարկությունները հնչեցնում է ոչ թե ՌԴ ԱԳՆ-ն, այլ Պաշտպանության նախարարությունը։ Այս համատեքստում է նաև Հայաստանի պաշտպանության նախարարի վերջին փոփոխությունը, երբ ոչ այնքան վստահելի Արշակ Կարապետյանին փոխարինեց Նիկոլ Փաշինյանի մերձավոր զինակից Սուրեն Պապիկյանը։

Ըստ երևույթին, Ռուսաստանը չափազանց կոշտ է դրել հարցը՝ պահանջելով անհապաղ համաձայնություն կնքել և սկսել սահմանների վերաձևումը։ Եթե արտաքին քաղաքական գերատեսչության հետ հնարավոր էր բանակցություններով և քննարկումներով ժամանակ շահել, ՌԴ ռազմական գերատեսչությունը պարզապես պարտադրելու է անել իրենց կամքը։ Նիկոլ Փաշինյանի իշխանությունն, իհարկե, տևական ժամանակ խուսանավելուց հետո ստիպված է լինելու կատարել «մեծ եղբոր» պահանջները։ Փաշինյանական իշխանության հուզող միակ հարցը, ըստ էության, դելիմիտացիայից հետո հնարավոր բողոքի ակցիաները ճնշելը և սեփական իշխանության պահպանումն է լինելու։

Կարեն Հակոբյան