Խաղաղության դիսկուրսը մեռավ՝ այդպես էլ չծնված

Նիկոլ Փաշինյանի խաղաղության դիսկուրսը մեռավ՝ այդպես էլ չծնված, իսկ տարածաշրջանում խաղաղություն հաստատելու կոչերը, պարզվեց, ընդամենը շղարշ էին Հայաստանի ինքնիշխանությունը ոտատակ տալու համար։

Արցախյան 44-օրյա պատերազմից հետո վարչապետի աթոռը զբաղեցնող Նիկոլ Փաշինյանն ու իր կողմնակիցները հետևողականորեն առաջ էին մղում «հարևանների» հետ խաղաղության դարաշրջան հաստատելու, քաղաքական և տնտեսական առումով նորմալ գործակցելու, Ադրբեջանի հետ խնդիրները ի հաշիվ Հայաստանի և Արցախի լուծելու թշնամական օրակարգը։ Մինչդեռ, ՀՀ դավադիր իշխանությունները որևէ իրական և առարկայական քայլ չկատարեցին խաղաղության պատրաստվելու ուղղությամբ, փոխարենը՝ Հայաստանին կանգնեցրին նոր պատերազմի վտանգի առջև։

Խաղաղությունից խոսող իշխանությունը պետք է պատրաստ լիներ պատերազմի։ Օրինակ, երկիրը դներ ռազմական ռելսերի վրա, վերականգներ պատերազմում ջախջախված բանակն ու տնտեսությունը, ամրացներ հայկական ԶՈՒ դիրքերը, ռազմական արդյունաբերություն ստեղծեր, նոր սպառազինություններ գներ միջազգային գործընկերներից, արտաքին քաղաքական նպաստավոր պամաններ ապահովեր՝ ՀՀ շահերից բխող օրակարգը սպասարկելու համար։ Թե ինչ արեց փաշինյանական իշխանությունը, առանձնապես պատմելու չէ, բոլորն իրենց աչքով են տեսել։ Մինչդեռ թշնամին, առանց վայրկյան կորցնելու, շարունակեց զինվել, նոր սպառազինություններ գնել, ամրացնել իր զինված ուժերը, յուրացնել օկուպացված հայկական տարածքները, միջազգային նոր գործընկերներ գտնել, որոնք կօգնեին ադրբեջանական օրակարգն առաջ մղելուն։ Այս ամենի հետևանքով, միայն երեկ հայկական կողմը, պաշտոնական տվյալներով, ունի 1 զոհված և 13 գերեվարված զինծառայող։ Եվս 24 զինծառայողի հետ կապը կորել է մարտական գործողությունների ընթացքում և նրանց ճակատագիրն այս պահին անհայտ է։

Գերտերություններն էլ, ադրբեջանական հարձակումը դատապարտելու փոխարեն, խայտառակ և հակահայ հայտարարություններ են տարածում՝ հավասարության նշան դնելով Հայաստանի և Ադրբեջանի միջև։ Այս ամենը վկայում է, որ խաղաղություն մուրացողի հետ հաշվի չեն նստում, նրան չեն հարգում, նրա աղաղակները բանի տեղ չեն դնում։ Խաղաղությունը չեն մուրում այնպես, ինչպես դա անում էր Նիկոլ Փաշինյանը՝ հանուն իր իշխանության պահպանման։ Ու Հայաստանը շարունակելու է կորցնել թե՛ իր տարածքները, թե՛ ինքնիշխանությունը, քանի դեռ իշխանության ղեկին մնում են Նիկոլ Փաշինյանն ու իր կոհորտան։

Գևորգ Մարտիրոսյան