Նիկոլ Փաշինյանը չի վստահում հայկական բանակին

Նիկոլ Փաշինյանը չի վստահում հայկական բանակին, փորձում է վերահսկողությունը վերցնել իր ձեռքը։ Վարչապետի պաշտոնը զբաղեցնող անձը երեկ պաշտոնանկ է արել Պաշտպանության նախարար Արշակ Կարապետյանին և այդ պաշտոնին նշանակել է փոխվարչապետ Սուրեն Պապիկյանին։ Մամուլում լուրեր են շրջանառվում, որ ՊՆ մամուլի քարտուղար էլ նշանակելու են Մանե Գևորգյանին՝ Փաշինյանի նախկին խոսնակին, ով օրերս էր ազատվել աշխատանքից։

Արշակ Կարապետյանի պաշտոնանկությունը ֆորմալ առումով իշխանական սպասարկուները կապում են ՀՀ տարածք ադրբեջանական ուժերի ներթափանցման, Ջերմուկում և Սիսիանում դիրքեր կորցնելու, նաև տարածված տեսանյութերի հետ, որտեղ հայ զինվորները ստիպված են լինում ադրբեջանցիների նվաստացումների ուղեկցությամբ մի քանի դիրք լքել։ Ընդդիմադիր մամուլն էլ սեփական վարկածներն է առաջ քաշում, թե Կարապետյանը հրաժարվել է ստորագրել հայկական զորքերի հետքաշման հրամանը։ Լուրեր են շրջանառվում, թե նրան պատժում են Արցախ այցելելու համար։ Ամեն դեպքում, փաստ է, որ Նիկոլ Փաշինյանը հետևողականորեն շարունակում է հայկական զինված ուժերը վարկաբեկելու, բանակը հոգեբանորեն ջախջախելու, հայ զինվորին և սպային բարոյազրկելու իր հայրենադավ քաղաքականությունը։

Ինչ-որ պահի զինված ուժերը ստիպված են լինելու դիմադրել «գերագույն գլխավոր թյուրիմացության» այս վարքին, իսկ զինվորական ուղի անցած նախարարը, որքան էլ Փաշինյանի խամաճիկը լիներ, չէր կարողանալու հանդուրժել նման քայլերը։

Չունենալով մասնագիտական և մարդկային որակներով օժտված որևէ կադր՝ Փաշինյանը Պապիկյանին հիմա էլ նշանակում է պաշտպանության նախարար։ Պապիկյանի առնչությունը բանակին միայն իր զինվորական ծառայությունն է, սերժանտական կոչումը, հրամանատարին դանակահարելու համար դատված լինելու փաստը։ Նրա կարիերան կապված է բացառապես Նիկոլ Փաշինյանի հետ, և անմռունչ հնազանդվելու ու կատարելու է վարչապետի բոլոր ապօրինի հրահանգները, բանակից հեռացնելու է սեփական դեմք և արժանապատվություն ունեցող սպաներին, վերահսկելու է ֆինանսական հոսքերը, մեկ առ մեկ թշնամուն է հանձնելու նրա պահանջած դիրքերը։ Սխալ կլինի ասել, թե Փաշինյանը վստահում է Պապիկյանին։ Ի ծնե կասկածամիտ Նիկոլը Պապիկյանին էլ վերահսկելու է նախարարի պաշտոնում։ Դրա համար էլ մամուլի քարտուղար է նշանակում Մանե Գևորգյանին։

Վահան Սարգսյան