Չարաշահումներ ու կեղծիք․ Նիկոլ Փաշինյանը գերազանցում է իր նախկիններին

Արդարության ու իրավունքի գերակայության կարգախոսներով իշխանության եկած ուժը չի խորշում ընտրակեղծիքներից, վարչական ռեսուրսի չարաշահումից։ Կապանում ՏԻՄ ընտրությունների ժամանակ Նիկոլ Փաշինյանի գլխավորած «Քաղաքացիական պայմանագիրը» վարչական ռեսուրս է չարաշահել, իսկ հանրային հեռուստաընկերությունը խիստ իշխանամետ դիրքերից է լուսաբանումն իրականացրել։

Արձանագրումը «Անկախ դիտորդ» նախաձեռնության ներկայացուցիչ Դանիել Իոաննիսյանն է արել՝ փաստեր ներկայացնելով։ Այդ փաստերն, իհարկե, նորություն չեն, հանրությունը վաղուց արդեն սովոր է, որ փաշինյանական իշխանությունը հատում է բոլոր կարմիր գծերը, ստում ու կեղծում։ Ուշագրավն այն է, որ այս իշխանության նախկին ու ներկա կողմնակիցներն անգամ չեն կարողանում աչք փակել Նիկոլ Փաշինյանի վարչախմբի ապօրինությունների վրա։ Ստիպված են լինում արձանագրել, որ կառավարությունը պետբյուջեից գումարներ հատկացնելով է փորձել ծանրության նժարը թեքել իր թիմակցի օգտին։ Արձանագրել, որ Հանրային կոչվող հեռուստատեսությունը ինչպես տարիներ շարունակ, այնպես էլ այսօր շարունակում է նույն մանիպուլյացիան և կեղծիքը։

«Հասկանալի է դառնում, թե ինչու էր «Քաղաքացիական պայմանագիրն» այդքան դեմ, որ ընդլայնվեն վարչական ռեսուրսի չարաշահման արգելքի սահմանները, իսկ դրա որոշ դրսևորումներ՝ քրեականացվեն»,- տարակուսում է Իոաննիսյանը, թեպետ տարակուսելու որևէ առիթ չկա։

Նիկոլ Փաշինյանն ու իր կողմնակիցները վաղուց են ապացուցել, որ շարքային ստախոս են, զուրկ մարդկային ու բարոյական որակներից, հանուն իշխանության պատրաստ են վնասել սեփական երկիրն ու ՀՀ հեղինակությունը, փոշիացնել իրենց իսկ հռչակած հեղափախական արժեքները։

«ՄԱԿ-ը քննադատել է ժողովրդավարության հետընթացը Հայաստանում։ Իրականում սկսվել է խորքային մի գործընթաց, որի արդյունքում Նիկոլ Փաշինյանի իշխանությունը կորցնելու է լեգիտիմությունը միջազգային կառույցներում ու պիտանելիությունը Մոսկվայում (արտաքին քաղաքական որոշակի օրակարգ սպառելուց հետո)»,- ֆեյսբուքյան իր էջում արձանագրել է քաղաքագետ Սուրեն Սուրենյանցը։

Արմեն Հարոյան