Փաշինյանը շարունակում է դիվանագիտական կորպուսի այլասերումը
ՎԵՐԼՈՒԾՈՒԹՅՈՒՆՆԵՐ
Հայաստանի դիվանագիտական կորպուսը Նիկոլ Փաշինյանի վարչախմբի կողմից ամենաշատ հարվածները ստացած կառույցն է։ Իհարկե, դիվանագետները ևս ունեն իրենց մեղքը այդ հանգամանքում։ Բողոքելու, իրենց մասնագիտական արժանապատվությունը պահպանելու փոխարեն արտաքին քաղաքական գերատեսչությունն էլ դարձել է դավադիր վարչախմբի կամակատարը։
Իսկ Փաշինյանն էլ լրջամիտ կադրային դիվանագետներին փոխարինում է իրեն նվիրված կուսակիցներով՝ հաշվի չառնելով, որ վերջիններս բացարձակապես չեն համապատասխանում դեսպանի բարձր պաշտոնի համար անհրաժեշտ որևէ որակավորման։
Հայաստանի նախագահ Արմեն Սարգսյանը հրամանագրեր է ստորագրել կարկառուն երկու նիկոլականի դեսպան նշանակելու մասին։ Նախկին պատգամավոր, մի քանի կուսակցություն փոխած Վիկտոր Ենգիբարյանը նշանակվել է դեսպան Գերմանիայում, Անվտանգության խորհրդի քարտուղարի աներձագ, «Սորոսի Սոս» մականունով հայտնի Սոս Ավետիսյանն էլ՝ դեսպան Իսպանիայում։ Թվում էր՝ Լիլիթ Մակունցին ԱՄՆ-ում, իսկ Վլադիմիր Կարապետյանին՝ Ուկրաինայում դեսպան նշանակելուց հետո այլևս չարժեր զարմանալ Փաշինյանի նշանակումների վրա, սակայն Ենգիբարյանի և Ավետիսյանի նշանակումները դուրս են որևէ տրամաբանությունից։ Նրանց այդ պաշտոններին նշանակել են բացարձակապես անձնական կապերի և կուսակցական հավատարմության շնորհիվ։
Լուրեր են շրջանառվում, որ Վրաստանում էլ դեսպան է նշանակվելու պատերազմի ժամանակ ԱԳ նախարարի պաշտոնը զբաղեցրած, ապա խայտառակ կերպով պաշտոնանկ արված Զոհրաբ Մնացականյանը։ Վերջինս Փաշինյանից ոչ պակաս մեղավորություն ունի բանակցային գործընթացը վիժեցնելու, «զրոյական կետից» սկսելու, պատերազմի ժամանակ ՀՀ միջազգային մեկուսացման, արտաքին քաղաքական ձախորդությունների մեջ։ Եվ այժմ էլ նրան նոր պաշտոնի նշանակելը ծաղր է Հայաստանի Հանրապետության նկատմամբ։
Այս ամենում տարօրինակը ՀՀ նախագահի աթոռը զբաղեցնող Արմեն Սարգսյանի պահվածքն է։ Սահմանադրության երաշխավոր համարվող անձը համառորեն կատարում է Նիկոլ Փաշինյանի բոլոր քմահաճույքները։ Ի դեպ, նախկին պատգամավորներին դեսպան նշանակելու հրամանագրերը Արմեն Սարգսյանը ստորագրել է դեռ նոյեմբերի 5-ին, բայց միայն երեկ երեկոյան են դրանք հայտնվել նախագահի պաշտոնական կայքում և տարածվել լրատվամիջոցներով։
Դավիթ Երկնափեշյան
