Հայաստանի իշխանությունները ստախոս են․ և սա փաստի արձանագրում է

Հայաստանի իշխանությունները՝ Նիկոլ Փաշինյանի գլխավորությամբ, ստախոս են։ Եվ սա փաստի հստակ արձանագրում է։

Վարչապետի պաշտոնը զբաղեցնող անձը նախօրեին կառավարության նիստում հայտարարում էր, թե Գորիս-Կապան ճանապարհին ադրբեջանական հենակետերը առանձնակի լուրջ խնդիրներ չեն կարող հարուցել իրանական բեռնատարների համար, որոնք հարյուրներով անցնում են Տաթև-Աղվանի նոր ճանապարհով։

Մինչդեռ իրականությունը բոլորովին այլ է, իսկ նույն այդ իրանցի վարորդները բողոքում են՝  Տաթև-Աղվանի նոր ճանապարհը նեղ է բեռնատարների համար, անգամ վթարային իրավիճակներ են ստեղծվում: Վարորդներն «Ազատություն» ռադիոկայանին են ասել, թե նոր ճանապարհով գալիս են, քանի որ ադրբեջանական վերահսկողության տակ գտնվող հատվածով անցնելիս բավականին խնդիրներ են առաջանում: Նրանց փոխանցմամբ՝ մոտավորապես 130 դոլարի չափ հարկ են վճարում:

Իշխանությունը լկտիաբար ստում է ոչ միայն ճանապարհի մասին։ Մինչ ԱԺ փոխնախագահ Ռուբեն Ռուբինյանը հայտարարում է, թե ադրբեջանցիների հետ նախնական պայմանավորվածություն չի եղել ճանապարհին մաքսակետեր տեղակայելու հարցով, և Ադրբեջանի այս որոշումն անակնկալ է եղել իրենց համար, Անվտանգության խորհրդի ոչ պակաս տխրահռչակ քարտուղար Արմեն Գրիգորյանը կրկին պնդում է, թե ադրբեջանցիների հետ պայմանավորվածություն է եղել ժամանակավորապես շահագործել Գորիս-Կապան ճանապարհը, մինչև նոր ճանապարհի շինարարությունը։

Ով է ճիշտ և ով՝ սխալ, բարդ է ասել։ Փաստն այն է, որ Հայաստանի գործող իշխանությունները Ադրբեջանի վարչախմբի հետ սինքրոն են գործում իրենց հակահայ ծրագրերում։ Իսկ հետևանքը ողբերգական է։ Մարդկային ճակատագրեր են խեղվում Սյունիքի սահմանամերձ դարձած բնակավայրերում, անտանելի հումանիտար ճգնաժամ է առաջանում, աշակերտները զրկվում են ուսման, գյուղերի բնակիչները՝ սնունդ և անվտանգ միջավայր ունենալու հնարավորությունից։

Եթե սա դավաճանություն չէ, ապա ո՞րն է դավաճանությունը։ Նիկոլ Փաշինյանի գլխավորած քաղաքական ուժը որևէ օրգանական կապ չունի Հայաստանի Հանրապետության հետ։ Կոլաբորացիոնիստական և զավթիչ միավորումը պետք է արմատախիլ արվի ՀՀ տարածքից և պատմությունից, և ուղարկվի աղբանոցը, այդ բառի բոլոր իմաստներով։

Սամսոն Դարբինյան