Թուրքիան և Ադրբեջանը շարունակում են հակահայկական գործելաոճը, իսկ ՀՀ իշխանությունը ստում է և մանիպուլացնում

Մինչ Հայաստանի գործող իշխանությունները՝ Նիկոլ Փաշինյանի գլխավորությամբ, փորձում են Սյունիքում կատարվողը ներկայացնել որպես հայկական կողմի հաղթանակ, Թուրքիան և Ադրբեջանը շարունակում են ճնշումներ բանեցնել, պարտադրել այսպես կոչված «միջանցքի» իրենց տեսլականը։

Թուրքիայի արտաքին գերատեսչության ղեկավար Մևլութ Չավուշօղլուն երեկ Ստամբուլում Թյուրքական խորհրդի արտգործնախարարների 8-րդ համաժողովում ասել է, որ Անկարան առաջարկում է «վերացնել թյուրքալեզու երկրների համագործակցության խոչընդոտները»: Չավուշօղլուն Ստամբուլում ևս մեկ անգամ շնորհավորել է Ադրբեջանին «44-օրյա պատերազմում հաղթելու կապակցությամբ»: 

«Հաղթանակը բացել է մեր տարածաշրջանում երկարատև խաղաղություն և կայունություն ապահովելու ճանապարհը»,- հայտարարել է Չավուշօղլուն: Ադրբեջանի արտաքին գործերի նախարար Ջեյհուն Բայրամովն էլ նույն նիստում շարունակել է զարգացնել «Զանգեզուրի միջանցքի» գաղափարը։ Բայրամովը «ուշադրություն է հրավիրել Հարավային Կովկասում խաղաղ նախաձեռնությունների և Բաքվի ու Անկարայի հաջող համագործակցության վրա։ Դրա վառ վկայությունն է 3+3 նախաձեռնությունը՝ ուղղված հետհակամարտային տարածաշրջանային համագործակցությանը»։

Ադրբեջանցի նախարարի խոսքով՝ «այս ձևաչափը կարող է համագործակցության օգտակար մեխանիզմ դառնալ Հայաստանի կողմից ադրբեջանական հողերի բազմամյա օկուպացիայի ավարտի ֆոնին»։

Ադրբեջանական դիվանագիտության ղեկավարը վստահություն է հայտնել, որ այսուհետ գործընթացները Հարավային Կովկասում զարգանալու են միանգամայն այլ հունով. «Ադրբեջանի, Ռուսաստանի և Հայաստանի առաջնորդների 2020թ. նոյեմբերի 10-ի համատեղ հայտարարությունը հետագա ընթացք ստացավ 2021թ. հունվարի 11-ի Եռակողմ հայտարարության ընդունմամբ, որը վերաբերում է տարածաշրջանում հաղորդակցությունների ապաշրջափակմանը։ Նախաձեռնվում են տրանսպորտային ճանապարհների ապաշրջափակման կոնկրետ քայլեր, այդ թվում շատ կարևոր է Զանգեզուրի միջանցքը, ինչը կնպաստի ապրանքաշրջանառության աճին տարածաշրջանում։ Հույս ունենք, որ Թյուրքական խորհրդի գործընկերները նույնպես կօգտվեն այդ հնարավորություններից»։

Նշենք, որ հայկական կողմը բազմիցս հայտարարել է, որ «միջանցքներ» չեն լինելու, իսկ հաղորդակցությունների ապաշրջափակումը ենթադրում է ճանապարհների բացում, որոնք գտնվելու են պետությունների տարածքային իրավազորության ներքո։ Իսկ Գորիս-Կապան ճանապարհին ադրբեջանական մաքսակետեր դնելու լուրից հետո փաշինյանական իշխանության որոշ ներկայացուցիչներ շարունակում են պնդել, թե Հայաստանը չմտավ Ադրբեջանի՝ միջանցքային տրամաբանության մեջ։

Գագիկ Գրիգորյան