Էրդողանի նեոօսմանյան երազանքները վտանգավոր են տարածաշրջանի համար

Թուրքիան արագ քայլերով դառնում է մեր տարածաշրջանի գլխավոր սպառնալիքը, իսկ գերտերությունները չեն էլ փորձում կասեցնել նրա այս վտանգավոր ընթացքը։ Թուրքիայի հիմնադիր Մուստաֆա Քեմալ Աթաթուրքի հիշատակի արարողության ժամանակ Թուրքիայի նախագահ Ռեջեփ Թայիփ Էրդողանը հայտարարել է, թե հույս ունի, որ Թուրքիան կդառնա «աշխարհի առաջատար տերություններից մեկը»։

«Կարևոր է շարունակել նրա աշխատանքը, հետևել Հանրապետության հիմնադրի պատվիրաններին»,- ասել է Էրդողանը։

Նրա խոսքով՝ Թուրքիայի ներկայիս իշխանությունները «հետևում են առաջին նախագահի կտակած քաղաքականությանը՝ ամրապնդելով երկրի քաղաքական դիրքերը, զարգացնելով տնտեսությունն ու ռազմական հզորությունը»։

«Մուսթաֆա Քեմալ Աթաթուրքը գտնվում էր բոլոր ճակատների առաջնագծերում, ներկայացնում էր թուրք ժողովրդի շահերը»,- ասել է նա՝ նկատի ունենալով Աթաթուրքի՝ հյուսիսային Աֆրիկայում և Մերձավոր Արևելքում գտնվելու ժամանակաշրջանը։

Նրա խոսքով՝ Թուրքիան ներկայումս ներգրավված է Սիրիայում, Լիբիայում և Կովկասում ընթացող գործընթացներում։ Էրդողանը, որ Աթաթուրքի հիմնած կուսակցության գլխավոր հակառակորդն է, տարիներ շարունակ պայքարելու է նրա ժառանգության դեմ, խարխլել Աթաթուրքի ստեղծած պետության հիմքերը, բանակին զրկել իր քաղաքական կշռից և դարձրել իր խամաճիկը, խորհրդարանական երկիրը վերածել միանձնյա կառավարվող նախագահական երկրի, իսկ այսօր, երբ իրեն ձեռնտու է, հիշում է վերջինիս կտակած քաղաքականության մասին։ Սա ևս մեկ անգամ վկայում է, որ Թուրքիան և թուրքական իշխանությունները չունեն բարոյական և քաղաքական արգելակներ, հանուն իրենց հզորացման պատրաստ են ցանկացած քայլի։ Իհարկե, ԱՄՆ-ը և Ռուսաստանը փորձում են երբեմն-երբեմն պատժամիջոցների կամ եղանակներով վնասել Թուրքիային, սակայն նրանց գործադրած ջանքերը չափազանց թույլ են, որպեսզի կարողանան կասեցնել նոր հրեշի առաջացումը։ Եթե չկասեցվի թուրքական պետության հետագա հզորացումը, ապա լրջագույն սպառնալիք է կախվելու տարածաշրջանի այլ երկրների գլխին ևս։ Մինչդեռ, ԱՄՆ-ը և Ռուսաստանը մրցման մեջ են մտել, թե ով ավելի շատ զենք կառաջարկի Էրդողանին` ինքնաթիռներ, զենիթահրթիռային համալիրներ, և այլն։

Հայկ Առաքելյան