Նախկինները՝ նախկինների դեմ․ 36 համայնքներում ՔՊ-ին ծանր փորձություն է սպասվում

Այսօր՝ նոյեմբերի 10-ին մեկնարկում է դեկտեմբերի 5-ին կայանալիք ՏԻՄ ընտրությունների քարոզարշավը։ Արագածոտնի, Արարատի, Արմավիրի, Գեղարքունիքի, Լոռու, Կոտայքի, Շիրակի, Վայոց ձորի և Տավուշի մարզերի 36 խոշոր համայնքներում ընտրությունները կայանալու են համամասնական ընտրակարգով։ Իշխող «Քաղաքացիական պայմանագիր» կուսակցությունը գրեթե բոլոր համայնքներում թեկնածուներ է առաջադրել, մի քանի համայնքում էլ աջակցում է գործող քաղաքապետերի ձևավորած դաշինքներին։

Ընտրական ցուցակները նայելիս՝ տպավորություն է, թե նախկիններն են պայքարում նախկինների դեմ, իսկ Նիկոլ Փաշինյանը, ինչպես չուներ թիմակիցներ, այնպես էլ հիմա չունի։ Հնարավոր ու անհնարին բոլոր մեղքերը նախկինների վրա բարդող իշխանությունը մնացել է նույն այդ նախկինների կադրերի հույսին, նրանց միջոցով է փորձում հաղթանակ կորզել ընտրություններում։ Գյումրիում ու Գորիսում կրած խայտառակ պարտություններից հետո թե՛ նոյեմբերի 14-ի, թե՛ դեկտեմբերի 5-ի ընտրությունները լուրջ գլխացավանք են դառնալու Նիկոլ Փաշինյանի համար։

Արդեն իսկ ակնհայտ է, որ մի ամբողջ շարք խոշորացված համայնքներում Նիկոլ Փաշինյանի գլխավորած ուժը ծանր պարտություն է կրելու, իսկ հաղթելու դեպքում էլ այդ հաղթանակը ամուր կոչելն անհնարին է։ Հատկապես բարդ է լինելու «Քաղաքացիական պայմանագրի» համար Արտաշատ և Վեդի քաղաքներում, Լոռու մարզի Սպիտակ և Վանաձոր քաղաքներում, Աբովյանում, որտեղ իշխանության հիմնական մրցակիցն ԱԺ նախկին պատգամավոր Էդուարդ Բաբայանն է։ Մասիսում արժանի դիմադրություն է ցուցաբերելու գործող քաղաքապետ Դավիթ Համբարձումյանի դաշինքը։ ՔՊ մեր աղբյուրների փոխանցմամբ՝ իշխող ուժը գրեթե հույս չունի Վայք և Նոյեմբերյան քաղաքներում, և սրտատրոփ սպասում են իրենց պարտության արձանագրմանը։ Ամեն դեպքում, դեկտեմբերի 5-ի ընտրությունները հիմք են դնելու Նիկոլ Փաշինյանի ուժի առավել թուլացմանն ու հեռացմանը պատմության թատերաբեմից։

Տարոն Նիկողոսյան