Փաշինյանական իշխանությունն ամեն կերպ խոչընդոտում է պատերազմի հանգամանքների քննությանը

Գործող իշխանությունները՝ Նիկոլ Փաշինյանի գլխավորությամբ, նույնիսկ չեն էլ թաքցնում արցախյան 44-օրյա պատերազմի հանգամանքների հետաքննությանը խոչընդոտելու իրենց նկրտումները։ Միաժամանակ, անսահման ցինիզմով և ընդդիմադիրներին մեղադրելով, փորձում են մեղքը բարդել ուրիշների վրա։ Ազգային ժողովի պաշտպանության և անվտանգության հարցերի մշտական հանձնաժողովը, որն ի պաշտոնե պիտի քննի պատերազմի հանգամանքները, նույնիսկ փորձ էլ չի արել քայլեր ձեռնարկել այդ ուղղությամբ, փոխարենը 11-րդ անգամ շարունակ մերժում է հանձնաժողովի փոխնախագահի պաշտոնում «Հայաստան» դաշինքի պատգամավոր Արթուր Ղազինյանի ընտրությունը։

Երեկվա նիստին մասնակցում էր նաև Հայաստանի պաշտպանության նախարարության նախկին ներկայացուցիչ Արծրուն Հովհաննիսյանը։ 44 օր շարունակ նպատակաուղղված սուտ և կեղծիք տարածած անձը փոխանակ ցուցմունքներ տա հանձնաժողովի առջև, պատասխանի ընդդիմության հարցերին, նշանակվում է փորձագետ նույն այդ հանձնաժողովում։ Թերևս, հենց այդ նպատակով էլ նշանակել են, որ սուտն ու կեղծիքը շարունակի նաև պաշտպանության և անվտանգության հարցերի մշտական հանձնաժողովում, իսկ ընդդիմությունը չկարողանա նրան հարցեր ուղղել պատերազմի ժամանակ իր դավադիր պահվածքի համար։ Ի դեպ, հանձնաժողովը մտադիր է իր աշխատանքներում ներգրավել նաև արտախորհրդարանական ուժերի։ Մասնավորապես, Նիկոլ Փաշինյանը որոշել է հանձնաժողով գործուղել Դավիթ Սանասարյանին, Նորայր Նորիկյանին և Արցախի Անվտանգության խորհրդի նախկին քարտուղար Սամվել Բաբայանին։ Վերջինս օրեր առաջ նույնիսկ իր կողմնակիցներին էլ շոկի մատնել՝ հայտարարելով, թե պետք է դատի տալ Միավորված ազգերի կազմակերպությանը։

Ահա այսպիսի կազմով էլ Նիկոլ Փաշինյանի խամաճիկները փորձելու են քննել, իսկ իրականում կրկին կեղծել պատերազմի հանգամանքները, երբ լույս սփռելու փոխարեն ավելի կխճճեն քննությունը։ Թեպետ, դա էլ չի փրկելու Նիկոլ Փաշինյանին։ Հանրությունը հրաշալի գիտի, թե ովքեր են մեղավոր պարտության համար, և ինչ պիտի անել նրանց հետ իշխանափոխությունից հետո։

Տիգրան Ավետիսյան