Եթե տեխնիկական և ապրանքագիտական մասով փորձաքննություն անցկացվի, ապա կպարզվի, որ այդ հրթիռները լավ էլ պիտանի են ուստի համապատասխան մարմինը փորձաքննության չի գնում
ՔԱՂԱՔԱԿԱՆՈՒԹՅՈՒՆ
Հայաստանյան լրատվամիջոցներից մեկը տեղեկություն էր հրապարակել, որ Նիկոլ Փաշինյանի մոտ իշխանությունների ներկայացուցիչները բարեխոսում են, որպեսզի ՀՀ ԶՈՒ ԳՇ պետի տեղակալ Ստեփան Գալստյանի խափանման միջոցը փոխվի: Ըստ լրատվամիջոցի բարեխոսումները դեռևս արդյունք չեն տվել:
Հիշեցնենք, որ ՀՀ ԶՈՒ ԳՇ պետի տեղակալ Ստեփան Գալստյանին մեղադրանք էր առաջադրվել «Անորակ հրթիռների» գործով։
Այս թեմայով զրուցել ենք Ստեփան Գալստյանի պաշտպան Օնիկ Առաքելյանի հետ։
Հարցին, թե ի՞նչ տեղեկություն կա այս մասին պաշտպանը ասաց․ «Նման տեղեկություն չունեմ, չեմ կարող ձեզ հստակ բան ասել: Ինչ վերաբերում է հետագայում կալանքի ժամկետի երկարաձգմանը, եթե օբյեկտիվ լինեն, ապա պետք է չերկարացնեն: Իսկ եթե իրենց քաղաքականությամբ պիտի զբաղվեն, չի բացառվում, որ երկարաձգեն կալանքի ժամկետը»։
Անդրադառնալով այն լուրերին, որ «անորակ հրթիռների» գործով ձերբակալված ՀՀ զինված ուժերի ավիացիայի վարչության ավիացիոն տեխնիկական ունեցվածքի ծառայության պետ Արտյոմ Համբարյանից և ավիացիայի վարչության գլխավոր ինժեներ Վլադիմիր Բաբայանից փորձ է արվել ցուցմունքներ կորզել Ստեփան Գալստյանի դեմ` պայմանով, որ կալանավորման միջնորդությամբ չեն դիմի դատարան ԳՇ պետի տեղակալի փաստաբանն ասաց, որ այս մասով որևէ բան ասել չի կարող․ «Գործի առանձնահատկություններից ելնելով՝ չեմ կարող մանրամասներ հայտնել»։
Ստեփան Գալստյանի փաստաբանը ևս այն կարծիքին է, որ եթե տեխնիկական և ապրանքագիտական մասով փորձաքննություն անցկացվի, ապա ամեն ինչ պարզ կլինի, ուստի համապատասխան մարմինը դրան չի գնում:
«Կպարզվի, որ այդ հրթիռները լավ էլ պիտանի են, իրենց «դերը» կատարում են: Հետո արդեն մարդիկ իրենց այս արած գործողությունների համար պիտի պատասխան տան, չէ՞: Եվ պատասխանը չեն կարողանալու տալ»,- շեշտեց փաստաբանը՝ հավելելով, որ գործով առերեսումներ չեն եղել:
«Վստահորդը ոչ մի գործընթացի հետ կապ չունի՝ ոչ գնման, ոչ այլ: Մենք էլ չենք հասկանում, թե ի՞նչ է արել պարոն Գալստյանը: Ինքն ի պաշտոնե Ավիացիայի վարչությանը հարցնում է՝ ձեզ ի՞նչ է պետք, ասենք, օրինակ, ասում են՝ պետք է այսքան հատ այսինչ հրթիռից, դա փոխանցում է վերադասին: Ինքը չի որոշում դրա առնել-չառնելու հարցը: Եթե կան միջոցներ, հնարավորություն՝ առնում են, չկա՝ չեն առնում: Ստեփան Գալստյանը չունի նաև դրանց որակը ստուգելու լիազորություն: Կա հանձնաժողով, որը ստուգում է և ասում՝ պիտանի է կամ պիտանի չէ»,- նշեց Առաքելյանը:
Սոնա Գիշյան
