Պարգևատրում ընտրություններում պարտության համար

Գյումրիի ՏԻՄ ընտրություններում պարտվելու համար արդեն նախկին մարզպետ Հովհաննես Հարությունյանին անգործ չթողեցին․ Նիկոլ Փաշինյանը նրան երեկ նշանակել է տարածքային կառավարման և ենթակառուցվածքների փոխնախարար: Հարությունյանը նոյեմբերի 4-ին ազատվեց Շիրակի մարզպետի պաշտոնից, որը զբաղեցնում էր 2021-ի հունվարից։ Նա հոկտեմբերի 17-ի ՏԻՄ ընտրություններում «Քաղաքացիական պայմանագրի» Գյումրիի քաղաքապետի թեկնածուն էր, իշխող կուսակցությունը պարտվեց Գյումրիում։ Դրանից անմիջապես հետո «Քաղաքացիական պայմանագիր» խմբակցության քարտուղար Նազելի Բաղդասարյանը հրաժարվեց մանդատից, ինչից հետո մամուլում լուրեր շրջանառվեցին, թե Հարությունյանին պատժելու են պարտության համար, իսկ մարզպետի պաշտոնը բաժին կհասնի հենց Բաղդասարյանին։ Թեև խոսվում էր, որ Հովհաննես Հարությունյանին հետ են ուղարկելու առողջապահության նախարարություն, սակայն նրան փոխնախարար նշանակեցին այլ նախարարությունում։

Իսկ Նիկոլ Փաշինյանը երեկ վերջապես ստորագրեց Նազելի Բաղդասարյանին Շիրակի մարզպետ նշանակելու հրամանը։ Բաղդասարյանին խրախուսելու գործողությունը սրանով չի ավարտվում։ Գյումրիում խոսում են, որ նրա եղբորը՝ Արման Բաղդասարյանին էլ նշանակելու են Գյումրիի փոխքաղաքապետ։ Թերևս, Նազելի Բաղդասարյանը կարողացել է Նիկոլ Փաշինյանին համոզել, թե անձնապես որևէ մեղք չունի Գյումրիում կրած պարտության համար։ Ընդհակառակը, պարտությունից հետո Գյումրիում կոալիցիա կազմելու հարցում էլ մեծ է նրա դերակատարումը։ Իզուր չէ, որ հենց Բաղդասարյանի օգնականը ստորագրեց կոալիցվելու հուշագիրը։

Շիրակի մարզը միակն է, որտեղ երբևէ կին մարզպետ է եղել։ Նախկինում էլ մարզպետ նշանակվել էր Լիդա Նանյանը։ Իսկ «Քաղաքացիական պայմանագիր» խմբակցությունում դեռ կամուկացի մեջ են, չգիտեն, թե ում նշանակեն խմբակցության քարտուղար։ Մեր աղբյուրների փոխանցմամբ, որոշվել է, որ կրկին կին պիտի նշանակվի, բայց մի քանի խմբավորումների բաժանված խմբակցությունը այդպես էլ չի կարողանում որոշել թեկնածուին։ Ի վերջո, Ալեն Սիմոնյանի որոշմանն են թողել, թե ով պիտի լինի խմբակցության քարտուղարը։ Սիմոնյանն էլ դեռ չի կողմնորոշվում, թե ում նշանակի, որպեսզի ցնցումներ չլինեն։

Արթուր Թորոսյան