Ձախողված պաշտոնյային հիմա էլ դեսպան են նշանակելու

Պաշտպանության նախկին նախարար Վաղարշակ Հարությունյանին նոր պաշտոն են տալու, թերևս, Նիկոլ Փաշինյանի ապօրինի և դավաճանական հրամանը սրբորեն կատարելու համար։ Օրեր առաջ Ազգային ժողովի հարցուպատասխանի ժամանակ վարչապետի պաշտոնը զբաղեցնող Նիկոլ Փաշինյանը խոստովանեց՝ ինքն է տվել բանավոր հրամանը Սյունիքի սահմաններից հայկական զորքերի հետքաշման մասին։ Փաշինյանը խոստովանեց․ «Իմ համոզմունքն այն էր, որ եթե այդ որոշումը չկայացվեր, այնտեղ ռազմական գործողություններ էին սկսելու, և իրոք Սյունիքում մենք ունենալու էինք խնդիրներ։ Ես եմ հետ քաշվելու հրաման տվել, Վաղարշակ Հարությունյանն իրականացրել է այդ հրամանը»։

Վաղարշակ Հարությունյանին մի քանի ամիս առաջ են հեռացրել պաշտպանության նախարարի պաշտոնից, երկրորդ անգամ պատմության ընթացքում։ Տխրահռչակ գեներալ-լեյտենանտը կամային որևէ հատկանիշով, զինվորական ակնառու հաջողություններով երբեք աչքի չի ընկել։

Վազգեն Սարգսյանի օրոք նրան նշանակել էին նախարար, իսկ 2000թ․ Ռոբերտ Քոչարյանը հեռացրեց պաշտոնից՝ զրկելով նաև զինվորական կոչումից։ Հաջորդ անգամ նա այդ պաշտոնը ձեռք էր գցել պատերազմում կրած պարտությունից հետո և առարկայական որևէ քայլ չի կատարել բանակի մարտունակությունը վերականգնելու ուղղությամբ։ Անողնաշար այդ պաշտոնյան նույնիսկ ի վիճակի չեղավ կատարելու Փաշինյանի հրահանգները և իր ձեռքը վերցնելու զինված ուժերի ղեկավարումը և հեռացվեց պաշտոնից։ Նրա միակ «արժանիքն» այն էր, որ պարբերաբար տեղեկություններ էր տարածում, թե ջերմ շփումներ ունի Ռուսաստանում, և փաստացի միշտ էլ համարվել է ռուսական ազդեցության կրող։ Այժմ էլ մամուլը գրում է, թե Վաղարշակ Հարությունյանը նշանակվելու է Ռուսաստանում Հայաստանի դեսպան: Նշվում է, թե ՌԴ–ն արդեն իր համաձայնությունը տվել է:

Անկախ նրանից, որ Ռուսաստանը Հայաստանի միակ ռազմավարական դաշնակիցն է, այդ երկրում անհրաժեշտ է նշանակել բանիմաց և եռանդուն դիվանագետի, որը կկարողանար լուրջ պայքար մղել ադրբեջանական բավական հզոր լոբբիի դեմ, առաջ մղել ՀՀ շահերը։ Իսկ ձախողակ զինվորականի նշանակումը անգլերենի ուսուցչուհուն ԱՄՆ-ում դեսպան նշանակելու նույն մարտավարության շարունակությունն է, որը բացառապես խնդիրներ է հարուցելու Հայաստանի Հանրապետության համար։ Միգուցե, հենց դա էլ Նիկոլ Փաշինյանի ու նրա հովանավորների իրական նպատակն է։

Արամ Սիմոնյան