Ինչպե՞ս կորցնել դեմքը․ Նիկոլ Փաշինյանը արտաքին քաղաքականություն չունի

Հայաստանի հարավային հարևան Իրանը, ՀԱՊԿ-ում գործընկերներ Բելառուսն ու Ղազախստանը շնորհավորել են Ադրբեջանին՝ 44-օրյա պատերազմում հաղթանակի կապակցությամբ։ Իրանի ԱԳՆ խոսնակ Սայիդ Խաթիբզադեն հայտարարել է, որ Թեհրանը միշտ էլ աջակցել է «Ադրբեջանի տարածքային ամբողջականությանը»։ Ճեպազրույցի ընթացքում, խոսելով Ադրբեջանի ու Իրանի հարաբերությունների մասին, նա ասել է․ «Վերջին 30 տարիների ընթացքում մենք միշտ հանդես ենք եկել «Ադրբեջանի տարածքների օկուպացիայի դեմ» և աջակցել այդ երկրի ինքնիշխանությանն ու տարածքային ամբողջականությանը։ Երկու երկրների առաջնորդները ցանկանում են ընդլայնել հարաբերությունները, և պարբերական զրույցներ են տեղի ունենում արտաքին գործերի նախարարների ու այլ պաշտոնյաների միջև, և մենք հուսով ենք տեսնել հարաբերությունների առավելագույն զարգացում»։

Իսկ Բաքվում Իրանի դեսպանատունը թվիթերյան գրառմամբ շնորհավորել է Ադրբեջանի, այսպես ասած, «Հաղթանակի օրվա» կապակցությամբ։

«Իրանի դեսպանատունը շնորհավորում է բարեկամական ու եղբայրական Ադրբեջան պետությանն ու ժողովրդին՝ տարածքային ամբողջականության վերականգնման կապակցությամբ, մասնավորապես՝ մեր ընդհանուր սահմանների 132 կմ-անոց հատվածի վերականգնման միամյակի կապակցությամբ»,- ասվում է դեսպանատան գրառման մեջ։

«Հաղթանակի» կապակցությամբ Ալիևին շնորհավորել է նաև Բելառուսի նախագահ Ալեքսանդր Լուկաշենկոն։ Ավելին, Ալիևին հայտնել է, որ ի նշան երկու երկրների ժողովուրդների միջև բարեկամության, Մինսկում կտեղակայվի ծնունդով Գյանջայից պոետ Նիզամի Գյանջևիի արձանը: Հայաստանի հետ ռազմական և տնտեսական միևնույն դաշինքի անդամ Ղազախստանը ևս շնորհավորել էր Ադրբեջանին՝ 44-օրյա պատերազմում տարած հաղթանակի կապակցությամբ:

«Այս նշանակալի տոնը ընդմիշտ գրվել է Ադրբեջանական Հանրապետության փառապանծ տարեգրության մեջ, որպես խորհրդանիշ միասնության, տոկունության, անկոտրում կամքի Ձեր ժողովրդի` հանուն երկրի ինքնիշխանության և պետականության», - ասված է Ալիևին հղած Կասիմ-Ժոմարտ Տոկաևի ուղերձում:

Կարելի է, իհարկե, քննադատել Իրանին էլ, ՀԱՊԿ-ի գործընկերներին էլ այս պահվածքի համար, սակայն միակ մեղավորն ու պատասխանատուն Նիկոլ Փաշինյանն է՝ իր անատամ և անողնաշար արտաքին քաղաքականությամբ, հանուն իշխանազավթման՝ ՀՀ կենսական շահերը ոտնահարելով, Ադրբեջանի և Թուրքիայի նկրտումներին արժանապատիվ պատասխան չտալով։ Գործող իշխանությունների մեղքով Հայաստանի Հանրապետությունը կորցրել է սեփական դեմքը աշխարհում, դարձել մանրադրամ ու ծիծաղի առարկա։ 

Միհրան Բաբայան