Պարտությունից մեկ տարի անց․ Նիկոլ Փաշինյանի մեղքով վտանգված է Հայաստանի գոյությունը

Լրանում է ողբերգական պարտութան մեկ տարին․ 2020թ․ նոյեմբերի 9-ին Հայաստանի, Ռուսաստանի և Ադրբեջանի ղեկավարները ստորագրեցին եռակողմ հայտարարությունը, որով ամրագրվեց հայկական կողմի պարտությունը։ 44 օր շարունակ գործող իշխանությունները՝ Նիկոլ Փաշինյանի գլխավորությամբ, խաբեցին և ստեցին, «Հաղթելու ենք» պոռալով Հայաստանն ու Արցախը տարան պարտության, Արցախի տարածքների ահռելի բաժինը նվիրեցին թշնամուն, հազարավոր զինվորներ, կամավորականներ ու քաղաքացիական անձինք էլ ՀՀ դավադիր իշխանությունների մեղքով զոհ գնացին ադրբեջանա-թուրքական հրոսակների ձեռքով։

Մոտ 30 տարի հայկական զինված ուժերի վերահսկողության տակ անցած 7 շրջաններից զատ, Ադրբեջանին անցան նաև ԼՂԻՄ-ի մաս կազմող Հադրութն ու Շուշին, Արցախում ռուս խաղաղապահներ տեղակայվեցին, ու Հայաստանը պարտավորվեց իր տարածքով ցամաքային կապ ապահովել Ադրբեջանի ու Նախիջևանի միջև։ Մեկ տարի անց կարելի է արձանագրել՝ Նիկոլ Փաշինյանի վարչախումբը բացարձակապես ոչինչ չի արել պատերազմի հետևանքները վերացնելու, ջախջախված բանակն ու տնտեսությունը վերականգնելու, հասարակության պառակտվածությունը վերացնելու, երկրի սուբյեկտայնությունը վերականգնելու ուղղությամբ։ Ընդհակառակը, ամեն ինչ արել են՝ միայն իշխանության ղեկը պահելու, ՀՀ արժանապատվության և ինքնիշխանության հաշվին։ Փոխարենը, Ադրբեջանը շարունակում է զինվել, ամրապնդվել տարածաշրջանում, նոր սպառազինություններ գնել։

Մյուս կողմից էլ Ադրբեջանը շարունակում է խուճապ տարածել Արցախում և ՀՀ սահմանամերձ դարձած համայնքներում։ Երեկ էլ, երբ Իլհամ Ալիևը ադրբեջանական և թուրքական զինված ուժերի ղեկավարների էր հրավիրել Շուշի, ադրբեջանցի հրոսակների ձեռքով սպանվեց անմեղ հայ երիտասարդ, ևս երեքն էլ վիրավորվեցին։

«Թշնամին քթներիս տակ անում է այն ինչ ուզում է ու ոչ մի համաչափ գործողություն։ Այսօրվա իշխանություններով, կիրառվող գործիքակազմով որևէ արդյունավետ լուծում չի լինելու։ Սրանց կանգնեցնել է պետք, այսպես շարունակվել չի կարող»,- արձանագրում է ԱԺ ընդդիմադիր պատգամավոր Տիգրան Աբրահամյանը։

Քանի դեռ Հայաստանում շարունակում է իշխել Նիկոլ Փաշինյանի գլխավորած «Քաղաքացիական պայմանագիրը», Հայաստանի գոյությունը վտանգված է լինելու։

Տարոն Հակոբյան