Հայաստանին զոռով խցկելու են «3+3» ձևաչափ

Թուրքիայի առաջարկած և Ռուսաստանի կողմից քարոզվող «3+3» ձևաչափը միս ու արյուն ստանալու ճանապարհին է։ Առայժմ միայն Վրաստանն է, որ հստակ դեմ է արտահայտվել այս ձևաչափին։ 
Շաբաթներ շարունակ հայ հանրությունը շունչը պահած հետևում էր Իրանի դիմակայությանը Թուրքիայի և Ադրբեջանի հետ, անհիմն ակնկալում, թե Իրանը կվիժեցնի այդ ձևաչափի ստեղծումը։ Որոշ «վայ-փորձագետներ» այնքան հեռուն էին գնացել, որ հույսեր էին փայփայում, թե Իրանը ուղիղ դիմակայության մեջ կմտնի Ադրբեջանի հետ, իսկ դրանից կշահի Հայաստանը։ 

Նախօրեին Իրանի ԱԳՆ-ն հայտարարություն տարածեց, թե Իրանի արտգործնախարար Հոսեյն Ամիր Աբդոլլահիանը Ադրբեջանի ԱԳ նախարար Ջեյհուն Բայրամովի հետ հեռախոսազրույց է ունեցել և սատարել է «3+3» ձևաչափը։ ԱԳ նախարարը կարծում է, որ տարածաշրջանային խնդիրները կարելի է լուծել ներտարածաշրջանային մեխանիզմների միջոցով։ Հոսեյն Ամիր Աբդոլլահիանը նաև նշել է. «Վերջին ամիսներին որոշ թյուրիմացությունների հետ մեկտեղ ակտիվացել են կողմերը, որոնց դուր չեն գալիս մեր երկրների միջև լավ հարաբերությունները, ինչը մենք հաղթահարեցինք երկու երկրների պաշտոնական դեմքերի իմաստնության շնորհիվ, և հիմա մենք կարող ենք առաջ շարժվել դեպի երկկողմ հարաբերությունների ընդլայնումը»,- նշվում է հայտարարության մեջ:

«3+3» ձևաչափին ի վերջո, երեկ Հանրային հեռուստատեսության եթերում անդրադարձել է նաև Հայաստանի վարչապետի պաշտոնը զբաղեցնող Նիկոլ Փաշինյանը։

««3+3» հնարավոր ձևաչափը չպետք է իր օրակարգում ունենա այնպիսի հարցեր, որոնք մենք արդեն համաձայնեցված քննարկում ենք այլ ֆորմատներով։ Մասնավորապես, տարածաշրջանի կոմունիկացիաների բացման հարցը, ԼՂ խնդրի կարգավորման հարցը և այդպես շարունակ։ Եթե այդ ֆորմատը բերելու է նոր օրակարգ, փոխադարձ ընդունելի օրակարգ, ասենք, օրինակ տարածաշրջանի տնտեսական տարանցման հնարավորությունների ուսումնասիրություն, ապա մենք կարող ենք հետաքրքրված լինել»․- ասել է նա։

Գործող իշխանությունների մեղքով Հայաստանին բաժին հասած արհավիրքներին գումարվելու է նաև թուրքական դաշինքում մեր երկիրը խցկելու խայտառակ փաստը, և սա ևս մեկ դրվագ է Նիկոլ Փաշինյանի՝ ՀՀ դեմ կատարած հանցագործություններից։ Որքան այս ապիկար և դավաճանական ուժը շարունակում է իշխել Հայաստանում, այնքան նորանոր արհավիրքներ են բաժին հասնելու մեր երկրին։

Գագիկ Մարտիրոսյան