ՏԻՄ ընտրությունները նոր բարդություններ են բերելու Նիկոլ Փաշինյանի համար

Հայաստանի գործող իշխանությունները՝ Նիկոլ Փաշինյանի գլխավորությամբ, իրենց բոլոր ուժերը կենտրոնացրել են ՏԻՄ ընտրությունների վրա՝ հասկանալով, որ դրանց արդյունքից է կախված լինելու «Քաղաքացիական պայմանագիր» կուսակցության հետագա ճակատագիրը։ Նոյեմբերի 14-ին համամասնական ընտրակարգով ՏԻՄ ընտրություններ են կայանալու երեք համայնքներում։ Ստեփանավանում պայքարի մեջ են մտել «Հայ ազգային կոնգրես», «Բարգավաճ Հայաստան» և «Քաղաքացիական պայմանագիր» կուսակցությունները։

Մեր աղբյուրների փոխանցմամբ՝ իշխանությունները հույս ունեն լուրջ բարդությունների չհանդիպել Ստեփանավանում։ Այստեղ պատասխանատուները փոխվարչապետ Սուրեն Պապիկյանն ու ԱԺ պատգամավոր Արփի Դավոյանն են, ովքեր ծնվել են Ստեփանավանում։ Նրանց վրա է դրված վարչական և ֆինանսական ռեսուրսը օգտագործելու, «Քաղաքացիական պայմանագիր» կուսակցության հաղթանակն ապահովելու գործը։ Թեև ՔՊ-ն Ստեփանավանում լուրջ բարդացումներ չի սպասում, սակայն այս քաղաքի կորուստը Պապիկյանի համար փոխվարչապետի, իսկ Արփի Դավոյանի համար՝ Լոռու մարզպետի պաշտոնի կորուստ կարող են դառնալ։

Տավուշի մարզի Իջևան քաղաքում էլ գործող իշխանությանը դիմակայում է միայն Հայ հեղափոխական դաշնակցությունը։ Նիկոլ Փաշինյանն ակնկալում է հաղթել նաև հարազատ քաղաքում, թեև Տավուշի մեր աղբյուրներն էլ նշում են, թե ՔՊ-ի համար բոլորովին էլ հեշտ չի լինելու։

Ամենաբարդ ընտրապայքարը սպասվում է Սյունիքի մարզի Կապան քաղաքում։ «Քաղաքացիական պայմանագիր» կուսակցությանն այստեղ դիմադրում է «Շանթ դաշինքը», որի թեկնածուն գործող քաղաքապետ Գևորգ Փարսյանն է։ Քարոզարշավը Կապանում ընթանում է ողջ թափով, կապանցիները վստահ են՝ եթե իշխանությունը տոտալ ապօրինություններ չգործի, ապա իշխանական թեկնածուն գրեթե շանս չունի նույնիսկ մերձակա մրցակցություն ցուցաբերելու Փարսյանին։ Խորհրդարանական ընդդիմությունն էլ հստակ գիտակցում է, որ Կապանը կարող է նոր և ավելի ցավոտ հարված լինել Փաշինյանի իշխանությանը, ուստի լրջորեն աշխատում են Կապանում։ Այստեղ ի դեպ, ընտրությունների պատասխանատուն ոչ թե ԱԺ աշխատակազմի ղեկավար Արայիկ Հարությունյանն է, ով իր մտերիմ Դավիթ Դանիելյանին է առաջադրել որպես համայնքապետի թեկնածու, այլ նախկին փոխվարչապետ Տիգրան Ավինյանը։ Նրան դեղին քարտ են ցույց տվել Գորիսի համար, և Կապանում պարտությունը կարող է Ավինյանի համար քաղաքական կարիերայի անփառունակ ավարտ նշանակել։

Գրիգոր Հայրապետյան