Մենք ստիպված ենք լինելու վճարել մեր օրինական շահերով և մեր տարածքներով
ՔԱՂԱՔԱԿԱՆՈՒԹՅՈՒՆ
Հայաստանի, Ադրբեջանի և Ռուսաստանի ղեկավարների՝ նոյեմբերի 9-ին հնարավոր հանդիպման և սահմանազատման ու ապաշրջափակման փաստաթղթերի ստորագրման մասին տեղեկատվությունը չի հերքվել, չի էլ հաստատվել։
Այս թեմայով զրուցել ենք «Ազատ քաղաքացի» ՀԿ նախագահ Հովսեփ Խուրշուդյանի հետ։
Հարցին, թե ի՞նչ պետք է սպասել նոյեմբերի 9-ին Հովսեփ Խուրշուդյանը ասել է․ «Իրականում դա ևս մեկ վտանգավոր, խիստ ռիսկային խնդիր է: Անկախ այն բանից, որ մեծ հաշվով սահմանազատումն ու սահմանանշումը դրական գործընթաց է, սակայն պետք է հասկանալ, որ եթե մենք մտնենք դրա մեջ եռակողմ՝ Հայաստան-Ռուսաստան-Ադրբեջան ձևաչափով, ապա մենք լծակ ենք տալու Կրեմլին մանիպուլյացնելու և մեկ այս մեկ այն կողմ թեքվելով իր ուզածը ստանալու մեկ Հայաստանից, մեկ Ադրբեջանից՝ սահմանի այս կամ այն հատվածը ճշգրտելիս: Այսինքն, եթե մենք տանեինք այս խնդիրը ԵԱՀԿ, ապա սահմանների ճշգրտման այս գործընթացը տեղի կունենար միջազգային իրավունքի և նմանատիպ լավագույն պրակտիկաների շրջանակներում, ինչը ձեռնտու է Հայաստանին: Մինչդեռ տալով խնդրի լուծման բանալին կլեպտոկրատիկ իշխանություններ ունեցող Ռուսաստանի ձեռքը՝ մենք Պեպոյի պես այն տալիս ենք մի դատավորի, որը հաստատ կաշառվելու է դիմացի կողմին՝ Զիմզիմովին: Հիմա այդ կաշառքը կլինի գումարի, թե աշխարհաքաղաքական շահերի սպասարկման տեսքով՝ միևնույն է: Մենք ստիպված ենք լինելու վճարել մեր օրինական շահերով և մեր տարածքներով»:
Անդրադառնալով հարցին, թե ինչո՞ւ հայկական կողմից որևէ արձագանք չկա 3+3 ձևաչափի վերաբերյալ այն դեպքում, երբ ԱՄՆ-ն արտահայտել է իր դիրքորոշումը մասնագետն ասաց․ «Ես կարծում եմ, որ մեր իշխանությունները հասկանում են այն վտանգները, որն իր մեջ պարունակում է այս ձևաչափը և դեռ դիմադրում են դրան: Լավրովն արդեն ակնարկել է, որ այդ հարցում նրանք հաջողության դեռ չեն հասել Հայաստանի հետ իրենց բանակցություններում: Ոնց ես հասկանում եմ ՀՀ իշխանությունները ընտրել են ոչ թե մերժելու, այլ այդ ձևաչափին Հայաստանի միանալը մեր կենսական շահերի հարցում զիջումների օրինավոր պահանջի կատարմամբ պայմանավորելու մեթոդաբանությունը, որոնց Թուրքիան կամ Ադրբեջանը ակնհայտորեն չեն գնա: Թե կոնկրետ որ հարցերում զիջումների մասին է խոսքը, կդժվարանամ ասել»:
Սոնա Գիշյան
