Ալիևը մեղադրում է Հայաստանին, իսկ ՀՀ իշխանությունը ջայլամի պես գլուխը մտցրել է հողի տակ

Ադրբեջանը շարունակում է միջազգային ասպարեզում իր ագրեսիվ հռետորաբանությունը, Հայաստանին տարբեր հանցանքների մեջ մեղադրելու քաղաքականությունը, իսկ ՀՀ իշխանությունները ամիսներ շարունակ որևէ կերպ չեն արձագանքում։ Ադրբեջանի նախագահ Իլհամ Ալիևը հայտարարել է, որ «Հայաստանը 30 տարի շարունակ օկուպացրել է Ադրբեջանի տարածքի 20 տոկոսը և իրականացրել ռազմական և մարդկության դեմ հանցագործություններ»։ Այս մասին նա ասել է Բաքվում, Թյուրքալեզու պետությունների համագործակցության կազմակերպության գլխավոր դատախազների հետ հանդիպման ժամանակ։ Մասնավորապես, ըստ Ադրբեջանի նախագահի, Հայաստանն իբր թե «իրականացրել է էթնիկ զտումներ, ավելի քան մեկ միլիոն ադրբեջանցիների դարձրել է փախստական և բռնի հարկադրված»։

Ալիևը չի մոռացել Հայաստանին մեղադրել այսպես կոչված «Խոջալուի ցեղասպանության» իրականացման մեջ։ Նա միաժամանակ Հայաստանին մեղադրել է «Ղարաբաղյան պատերազմի ընթացքում ադրբեջանցի 4 հազար քաղաքացիների անհետ կորելու մեջ»։ Ալիևն ինքն իրեն դավաճանած կլիներ, եթե 44-օրյա պատերազմը չներկայացներ որպես «Ադրբեջանի հաղթական Հայրենական պատերազմ» և չշեշտեր, որ «այժմ ռեգիոնում այլ իրականություն է տիրում» և «շուտով բացվելու է Զանգեզուրյան միջանցքը», որը էական նպաստ է ունենալու ռեգիոնալ համագործակցության ոլորտում»։

Ադրբեջանի և Թուրքիայի նմանատիպ վարքագիծը այլևս զարմանալի չէ, անտրամաբանական չէ։ Մեր թշնամիները հետևողականորեն և նպատակամղված իրականացնում են իրենց քարոզչությունը։ Այլ հարց, որ Հայաստանի Հանրապետությունում չկա ադեկվատ իշխանություն, որը համարձակություն կունենար արձագանքել թշնամիներին։ Փոխարենն ունենք խաղաղության դարաշրջան քարոզող, ՀՀ ինքնիշխանությունը վտանգող, Արցախը ոչնչացրած և Հայաստանի գոյությունը վտանգի տակ դրած դավադիր ու ապիկար խառնամբոխ, որը ոչ պակաս հետևողականորեն իրականացնում է թուրքամետ քաղաքականություն։

Աշոտ Հայրապետյան