Առողջապահության նախարարությունը՝ կորոնավիրուսի տարածման հիմնական աղբյուր

Այսօր ուժի մեջ է մտնում առողջապահության նախարարի հերթական անհեթեթ հրամանը, որը, իբր, ուղղված է կորոնավիրուսի դեմ պայքարին, բայց իրականում ավելի է խորացնելու կորոնավիրուսով պայմանավորված ծանր իրավիճակը։ 

Ըստ Անահիտ Ավանեսյանի հրամանի՝ նոյեմբերի 1-ից պարտադիր է նաև հանրային բաց տարածքներում դիմակների կրումը։ Այդ հրամանը, ի դեպ, որոշ բացառություններ է թույլատրում։ Մասնավորապես, մինչև 5 տարեկան երեխաների, պաշտոնյաների, քրոնիկ շնչառական հիվանդությունների ունեցողների, հոգեկան, վարքի և կոգնիտիվ խանգարումներ ունեցողների համար։ Առողջապահության նախարարը, իհարկե, «մեծագույն» լավություն է արել, թույլ է տվել դիմակ չկրել ծխելուց, խմելուց և սնվելուց։ 

Մասնագետները նշում են, որ այս հրամանը որևէ կերպ չի նպաստելու կորոնավիրուսի դեմ պայքարին, այլ, ընդհակառակը, ավելի է խորացնելու իրավիճակը։ Հանրային վայրերում դիմակ չկրելու համար մարդիկ զանգվածաբար կշրջեն՝ սիգարետը կամ ջրի շիշը ձեռքներին, և պարեկներն էլ չեն կարողանա տուգանել կամ դիմակ պարտադրել։ Պատվաստումների լուրջ քարոզ անելու, հարկադիր կամ այլ եղանակներով պարտադրելու փոխարեն առողջապահության նախարարությունը խտրականություն է դրսևորում՝ պետական պաշտոնյաներին թույլ տալով դիմակ չկրել։ Վերջիններս, որ պիտի իրենց կերպարով օրինակ ծառայեին հանրությանը, այլևս դառնալու են ատելության առարկա։ Շարքային քաղաքացիների համար լիովին անհասկանալի է նման մոտեցումը, և հնարավոր չէ տրամաբանորեն բացատրել այս հանգամանքը։ 
Իսկ Հայաստանում այդ ընթացքում օրական հիսուն և ավելի մարդ է մահանում կորոնավիրուսից, մահճակալային ամբողջ ֆոնդը զբաղված է, թթվածին արտադրելու միջոցներն էլ սպառվելու վրա են։ Փաստենք, իրական քայլերի փոխարեն ՀՀ իշխանությունները զբաղված են կեղծ և բովանդակազուրկ քայլերով, ինչը մեկ անգամ ևս վկայում է, որ կորոնավիրուսի դեմ պայքարի ձախողումը հենց Նիկոլ Փաշինյանի ու նրա կողմնակիցների խղճին է։

Արթուր Թորոսյան