Փաշինյանին մերժեցին Գյումրիում, բայց նա խլեց իշխանությունը

Հոկտեմբերի 17-ին կայացած ՏԻՄ ընտրություններում իշխող «Քաղաքացիական պայմանագիրը» խայտառակ պարտություն կրեց Գյումրիում։ Գյումրեցիները նախընտրեցին իրենց քվեն տալ «Բալասանյան» դաշինքին, բայց ոչ Փաշինյանին, սակայն դա չխանգարեց, որ վերջինս յուրացնի իշխանությունը։ Դեռ ընտրություններից առաջ բազմիցս էինք նախազգուշացրել, որ Նիկոլ Փաշինյանը ընտրությունների գնում է ոչ միայն իր վարկաբեկված թիմով, այլև տարատեսակ արբանյակներով, որոնց հետ էլ վերջում փորձելու է իշխանություն ձևավորել։ Թեպետ գյումրեցիները հավատում էին, որ նախկին քաղաքապետ Սամվել Բալասանյանը չի դավաճանի իր քաղաքին, պարզվեց, որ նրա ճակատը բավական լայն է, ու ՔՊ գրառման համար էլ տեղ կա։ Նախօրեին «Բալասանյան» դաշինքը հուշագիր է ստորագրել «Քաղաքացիական պայմանագրի» հետ, որի արդյունքում ՔՊ-ն կստանա երկու փոխքաղաքապետի, մի քանի բաժնի պետերի պաշտոններ։ Հուշագիրը ստորագրել են «Բալասանյան» դաշինքից Սոնա Առաքելյանը և «Քաղաքացիական պայմանագիր» կուսակցությունից Քնարիկ Հարությունյանը: Վերջինս, ի դեպ, ԱԺ-ն լքող և Շիրակի մարզպետի պաշտոնին հավակնող Նազելի Բաղդասարյանի օգնականն է։

Գյումրիում խոսակցություններ կան, որ փոխքաղաքապետ կդառնան Նազելի Բաղդասարյանի եղբայր Արմանն ու օգնական Քնարիկը։ ՏԻՄ ընտրություններից հետո գործող մարզպետ Հովհաննես Հարությունյանին կրկին աքսորում են առողջապահության նախարարություն, իսկ մարզը հանձնում Նազելի Բաղդասարյանին։ Վերջինս հեղափոխությունից հետո կարողացել է դառնալ Նիկոլ Փաշինյանի մերձավորներից մեկը։ Իսկ հասարակությունը հերթական անգամ հիասթափվելու փոխարեն պետք է ավելի ճիշտ ընտրություն կատարի։ Նիկոլ Փաշինյանի ազգադավ ուժից բացի քվե չպետք է տալ նաև նրա արբանայկաներին։ Եթե փոփոխություններ են ուզում, ապա պետք է քվեն տալ միայն գործող իշխանությունների հետ համագործակցությունը բացառող, արմատական տրամադրված ընդդիմադիր քաղաքական ուժերին։ Այլապես, այլ բալասանյանների միջոցով Նիկոլ Փաշինյանը կզավթի իշխանությունը ՏԻՄ-երում և կծիծաղի հանրության ու քաղաքական ուժերի դեմքին։ 

Տիգրան Ապրեսյան