Պատերազմից հետո արտագաղթը շեշտակի ավելացել է․ Ապագա կա՞

Արցախյան 44-օրյա պատերազմում կրած խայտառակ պարտությունից և տնտեսական իրավիճակի վատթարացումից հետո Հայաստանի բնակչությունը արագորեն նվազում է։ ՀՀ քաղաքացիները տասնյակ հազարներով են լքում հայրենիքը՝ այլևս հույս չկապելով ՀՀ ապիկար և դավադիր իշխանությունների հետ։ Թեև հայաստանցիների նախընտրելի ուղղությունը շարունակում են մնալ Միացյալ Նահանգներն ո Եվրոպան, կորոնավիրուսի և վիզային սահմանափակումների պատճառով ամենաշատն արտագաղթում են Ռուսաստանի Դաշնություն։ Հայաստանը միգրանտների թվով 3–րդն է Ռուսաստանում։ Ռոսստատի տվյալներով ՝ Հայաստանը 2021 թվականին միգրանտների ներհոսքի առումով առաջատար երկրների եռյակում է։

Այսպես, 2021 թվականի հունվար-հուլիս ամիսներին Հայաստանից Ռուսաստան է ժամանել 20 հազար միգրանտ։ Նախօրեին էլ մեկ այլ տեղեկություն հայտնվեց, թե այս տարվա առաջին 6 ամիսներին Ռուսաստանի քաղաքացիություն է ստացել մոտ 22 հազար հայաստանցի: Ցուցանիշը ռեկորդային է անցած 4 տարիների նույն ժամանակահատվածի համեմատ: Պաշտոնական վիճակագրությամբ` ընդհանուր առմամբ Հայաստանը բացարձակ թվերով 4-րդ հորիզոնականն է զբաղեցնում Ռուսաստանի քաղաքացիություն ստացողների շարքում` Ուկրաինայից, Ղազախստանից և Տաջիկստանից հետո: Սեփական բնակչության և Ռուսաստանի քաղաքացիություն ստացածների համեմատությամբ, այնուամենայնիվ, Հայաստանն առաջինն է բոլոր երկրների շարքում:

Եթե գործող իշխանությունները՝ Նիկոլ Փաշինյանի գլխավորությամբ, դեռ կարող էին ինչ-ինչ պատճառներով արդարացնել աշխատանքային ժամանակավոր միգրացիան, ապա ՌԴ քաղաքացիության ստացումը պարզ ցուցիչ է, որ առնվազն 22 հազար մարդ այլևս հույս չի կապում հայրենիքի հետ, նախընտրում է դառնալ այլ երկրի քաղաքացի։ Եվ սա միայն Ռուսաստանի ցուցանիշներն են։ Այլ երկրների ցուցանիշները, հասկանալի պատճառներով, դեռ չկան։ Ուստի արձանագրենք, 2050 թվականին 5 միլիոն դառնալու փաշինյանական խոստումը հերթական փուչիկն է։ Հույսեր փայփայենք, որ ավելանալու փոխարեն մինչև այդ ժամանակ ՀՀ բնակչությունը չի պակասի։ Եթե, իհարկե, Հայաստանի Հանրապետություն մնա։

Հովհաննես Երանոսյան