Կապանում իրավիճակը թեժ է․ իշխանությունը փորձում է ապօրինություններով զավթել քաղաքապետի աթոռը

Սյունիքի մարզի Գորիս քաղաքում կրած խայտառակ պարտությունից հետո գործող իշխանություններն ամեն ինչ անում են Կապանն իրենց ձեռքից բաց չթողնելու համար։ Հիմնական մրցակցությունը Կապանում ընթանալու է գործող քաղաքապետ, «Շանթ» դաշինքով առաջադրված Գևորգ Փարսյանի և «Քաղաքացիական պայմանագիր» կուսակցության ցուցակը գլխավորող պատգամավոր Դավիթ Դանիելյանի միջև Փարսյանը Փաշինյանի թեկնածուին հաղթել է նույնիսկ 2018թ․, երբ «հեղափոխական» առաջնորդի վարկանիշը չափազանց բարձր էր, և այժմ Փաշինյանն ու իր կողմնակիցները հստակ գիտակցում են, թե ինչ բարդություններ են իրենց սպասվում։ Դանիելյանի հաղթանակը ապահովելու համար իշխանությունը դիմել է հնարավոր և անհնարին բոլոր միջոցներին, ընդհուպ ահաբեկումներ, վարչական և քաղաքական ռեսուրսի չարաշահումներ։

Իրավիճակը Կապանում այնքան է բարդացել, որ անգամ Մարդու իրավունքների պաշտպան Արման Թաթոյանն է ստիպված եղել հայտարարություն տարածել, ներկայացնել իշխանության օգտին կատարվող ապօրինությունները։ ՄԻՊ-ի փոխանցմամբ, իշխանության ճնշմամբ, «Չաարատ Կապան» ՓԲԸ ղեկավարությունն է ճնշումներ գործադրում իր աշխատակիցների նկատմամբ, պարտադրում դուրս գալ «Շանթ» դաշինքի ընտրացուցակից, կամ ազատվել աշխատանքից, և այս դեպքը եզակի չէ։ Իշխանությունները նաև փորձում են ազատվել «Սյունիքի մարզային տարածաշրջանային պետական քոլեջ» ՊՈԱԿ-ի տնօրենից, ով Կապանի փոխքաղաքապետի մայրն է։

«Ըստ մի շարք ահազանգերի՝ «Քաղաքացիական պայմանագիր» կուսակցության տարբեր աջակիցներ հետևում են համայնքի գործող ղեկավարի օգտին գրառումներ անող քաղաքացիների սոցիալական ցանցերի էջերին, և դրական գրառումների ու անգամ որևէ դրական գրառում հավանելու դեպքում՝ նկատողություններ են արվում, պահանջներ են ներկայացվում, որ գրառումները ջնջվեն կամ հավանումները հանվեն»,- նշել է Թաթոյանը:

Ընտրություններից օրեր առաջ, արձանագրենք, իրավիճակը թեժացել է։ Կապան են գործուղվել ՔՊ առաջատար դեմքերը, որոնց հանձնարարված է հնարավոր բոլոր միջոցներով ապահովել այդ քաղաքում որևէ ճանաչում և հեղինակություն չունեցող Դավիթ Դանիելյանի հաղթանակը։ 

Մանվել Մարկոսյան