Կորոնավիրուսի դեմ պայքարի ձախողումը սկսել է մտահոգել Փաշինյանին

Կորոնավիրուսից մահերի թվով մեկ միլիոն մարդու կտրվածքով Հայաստանն աշխարհում չորրորդ տեղում է։ Զիջում է միայն Ռումինիային, Բուլղարիային և Լատվիային։ Շաբաթական կտրվածքով կորոնավիրուսից մահերի աճը կազմում է 26 տոկոս։ Իրավիճակը խորանում է նրանով, որ մահճակալային ֆոնդն ամբողջությամբ լրացվել է, իսկ հիվանդանոցներում բավարար թթվածին չկա՝ հիվանդների համար։ 

Առողջապահության նախարարության փոխանցմամբ՝ այս պահին առկա 15-ից ավելի թթվածնային կայաններին միացել են նաև Ատոմային էլեկտրակայանը և Երևանի ֆիզիկայի ինստիտուտը, որոնք 24 ժամ թթվածին կարտադրեն՝ հիվանդանոցներին թթվածնով ապահովելու համար: Չնայած ծայրահեղ լարված համաճարակային իրավիճակին` կառավարությունը հակված չէ լոքդաունի գնալ։ Վարչապետի պաշտոնը զբաղեցնող Նիկոլ Փաշինյանը կառավարության նիստում հայտարարել է, թե այժմ երկու ուղղությամբ են աշխատում` առաջինը՝ դիմակների կրման կանոնների խստացումն է, երկրորդը՝ պատվաստումների ծավալի ընդլայնումը։ Յոթ ամիսների ընթացքում Հայաստանում դեռ բնակչության տասը տոկոսն էլ չի ստացել ամբողջական պատվաստում, ընդ որում՝ հայտնի էլ չէ, թե այս թիվը որքանով է արտացոլում իրականությունը, քանի որ կեղծ հավաստագրերի հարյուրավոր դեպքեր են բացահայտվել։ 

Ըստ էության, գործող իշխանություններն իրենք էլ ակամայից խոստովանում են՝ հիմնովին ձախողել են կորոնավիրուսի դեմ պայքարը։ Իշխանությունը չի կարողանում բնակչությանը ողջամիտ կերպով բացատրել պատվաստումների անհրաժեշտությունը, իսկ դա հանգեցնում է մահերի թվի աճի։ 

Այսօրվա դրությամբ, վարակման 2096 նոր դեպք է հայտնաբերվել, 43 մարդ մահացել է։ Ընդհանուր առմամբ, կորոնավիրուսի հետևանքով 6232 մահվան դեպք է արձանագրվել: Այլ հիվանդության պատճառով մահվան դեպքերի ընդհանուր թիվը 1288 է: Եվ, փաստացի, 7500 զոհերի մահվան թիվ մեկ պատասխանատուն և մեղավորը հենց գործող իշխանություններն են, որոնք անցած տարվա մարտից այս կողմ էական որևէ քայլ չեն կատարել կորոնավիրուսի մահաբեր ընթացքը կանգնեցնելու համար։

Մինաս Սարգսյան