Հայաստանը պատրաստ է սահմանազատմանը, բայց չգիտի, թե ոնց

Հայաստանի իշխանությունները պատրաստ են Ադրբեջանի հետ սահմանազատում և սահմանագծում իրականացնել, սակայն բացարձակապես չեն պատկերացնում, թե ինչպես է իրականացվելու այդ գործընթացը։ Անվտանգության խորհրդի տխրահռչակ քարտուղար Արմեն Գրիգորյանն է երեկ կառավարության նիստից հետո հայտարարել, թե այս պահին հստակություն չկա, թե որ քարտեզն է հիմք ընդունվելու Հայաստանի և Ադրբեջանի միջև սահմանազատման և սահմանագծման համար։

«Քարտեզների միջև տարբերություն կա։ Քարտեզ ասելով, երբ մենք նկատի ունենք իրավական հիմքով քարտեզը, միակ իրավական հիմք ունեցող հիմնական քարտեզը 20-ականների քարտեզն է, մի մասն ասում է՝ 26 թվականի, մի մասն ասում է՝ 29 թվականի։ Այս հարցում միասնական մոտեցում չկա, բայց հիմնական քարտեզը դա է», - ասել է Գրիգորյանը:

Ըստ ԱԽՔ-ի՝ հայկական կողմի համար որևէ խանգարող հանգամանք չկա սահմանազատման ու սահմանագծման գործընթաց սկսելու համար, սպասում են դրական ազդակների։

«Սպասում ենք դրական ազդակ այդ մասով Ադրբեջանից, կարծես թե սեպտեմբերին ՄԱԿ-ում նրանք այդպիսի հայտարարություն արել են, բայց մենք չենք կարողանում այդ մասով առաջ գնալ»,- նշել է Գրիգորյանը։

Անցած շաբաթ Ռուսաստանի նախագահ Վլադիմիր Պուտինն էր անդրադարձել հայ-ադրբեջանական սահմանագծման խնդիրներին՝ հայտարարելով, որ առանց Ռուսաստանի մասնակցության հնարավոր չէ ոչինչ անել, ասածը բացատրել այն հանգամանքով, որ Խորհրդային Միության քարտեզները ռուսական բանակի գլխավոր շտաբում են։ Հայաստանի իշխանությունների այս պիոներական պատրաստակամությունը, իհարկե, աչք է ծակում․ փաշինյանական իշխանությունը բացարձակապես չի տիրապետում որևէ քարտեզի, չգիտի, թե որտեղով են անցնելու սահմանները, սակայն անմռունչ թշնամուն է զիջում ՀՀ ինքնիշխան տարածքը՝ կտոր-կտոր։ Հետո էլ զարմանում են, երբ Նիկոլ Փաշինյանին ու իր կողմնակիցներին մեղադրում են դավաճանության մեջ։ Ի՞նչ է սա, եթե ոչ հստակ ապացուցված դավաճանություն։

Արամ Ներսիսյան