Թուրքիայի ախորժակը շատ մեծ է, և նրանք փորձում են ճնշել Հայաստանին, բայց պետք է ուժեղ լինել ու ոչ մի կերպ չընկրկել այդ ճնշումների դեմ
ՔԱՂԱՔԱԿԱՆՈՒԹՅՈՒՆ
Հայկական կողմը շարունակում է պնդել, որ ո՛չ բանավոր, ո՛չ գրավոր ձևաչափով երբեք չի քննարկվել ու չի քննարկվում միջանցքի տրամադրման հարց, սակայն թուրք-ադրբեջանական տանդեմը համառորեն խոսում է, այսպես կոչված, Զանգեզուրի միջանցքի մասին: Այս թեմայով զրուցել ենք թուրքագետ Ռուբեն Սաֆրաստյանի հետ։
Հարցին, թե թուրքական կողմը որևէ հիմք ունի՞, որ անընդհատ խոսում է այդ մասին, թե՞ քաղաքական ինչ նպատակ է հետապնդում թուրքագետը ասել է․ «Չեմ կարող ասել՝ հիմքեր կան, թե՝ չէ, բայց եթե մեր իշխանությունները հայտարարում են, որ նման հարց չի քննարկվում, չեմ կարծում, թե օդից են վերցնում սա, քննարկվում է կոմունիկացիաների բացման հարցը: Իսկ որ թուրքերն ու ազերիները մեծ համառությամբ կրկնում են միջանցք-միջանցք, քաղաքական նպատակ են հետապնդում: Առաջին հերթին՝ նրանք պետք է, իրենց ընկալմամբ, հնարավորինս լավ օգտագործեն այն հնարավորությունը, որն իրենց համար ստեղծվել է պատերազմից հետո, ճնշում գործադրեն Հայաստանի վրա ու գնալով ուժեղացնեն այդ ճնշումը, որ ինչ-որ զիջումներ պոկեն, ու այդ ճնշման մի մաս է կազմում միջանցքի մասին նրանց պարբերական հայտարարությունները: Միջանցքի մասին հայտարարությունները կարևոր են իրենց հասարակության համար, որ ցույց տան, թե իրական արդյունքներ կան հաղթանակի հետ կապված, որ երկու թուրքական երկիր արդեն կարողանում է կապվել իրար հետ, ինչը կարևոր է նաև պանթուրքական տեսանկյունից, որովհետև դա օրինակ է հանդիսանալու մյուս թյուրքալեզու երկրների համար: Եվ քանի որ երկու շաբաթից պետք է տեղի ունենա շատ կարևոր իրադարձություն՝ պանթուրքիզմի տեսակետից, Թյուրքալեզու երկրների խորհուրդը պետք է վերակազմավորվի ու դառնա Թուրքական միություն, ինչը նշանակում է, որ նրանք մոդել են ընտրել Եվրամիությունը, որը շատ բարձր ինտեգրացիայի մակարդակ ունի, ու դրա համար շատ կարևոր է, որ իրենք մյուս թյուրքալեզու երկրներին, որոնք մաս են կազմելու այդ միությանը, ցույց տան, թե՝ տեսեք, Թուրքիան ու Ադրբեջանն ինչքան մոտ են միմյանց ու հաղթանակ տարան Արցախի ու Հայաստանի նկատմամբ ու հիմա արդեն միջանցքով կապվում են իրար հետ և այլն: Մոտ մեկ շաբաթ առաջ Թուրքիայի պետական ռադիո և հեռուստատեսության ծառայությունը իր էջում արտերկրի համար տրվող հաղորդումների համար հրապարակել էր մի քարտեզ, որում իրենց ասած Զանգեզուրի միջանցքը ընդգրկում է ողջ Սյունիքը, ոչ թե միայն այդ ճանապարհը: Թուրքիայի ախորժակը շատ մեծ է ու այս կերպ փորձում են ճնշել Հայաստանին, բայց պետք է ուժեղ լինել ու ոչ մի կերպ չընկրկել այդ ճնշումների դեմ:
Սոնա Գիշյան
