Երբ Փաշինյանը պատասխան չունի․ լպիրշության մաստեր-կլաս վարչապետից
ՎԵՐԼՈՒԾՈՒԹՅՈՒՆՆԵՐ
Ազգային ժողովի հարցուպատասխանը, որ կայացավ երեկ, հերթական անգամ վկայեց՝ Նիկոլ Փաշինյանն ու իր կողմնակիցները բացարձակ կորցրել են իրականության և չափի զգացումը, իսկ ընդդիմադիրների մտահոգություններին և քննադատություններին պատասխանում են իրենց լկտիության ու բարոյազրկության ողջ ծավալով։ Հարցուպատասխանի հիմնական թեման սահմանային խնդիրներն էին։ Ընդդիմությունը մտահոգություն էր հայտնում, որ նախորդ օրը կայացած փակ քննարկմանը բավարար պատասխաններ չեն ստացել ԱԱԾ սահմանապահ զորքերի հրամանատարից և ԶՈՒ ԳՇ պետի տեղակալից։
Արծվիկ Մինասյանը առաջարկեց Փաշինյանին առաջարկեց հանդես գալ արտահերթ զեկույցով՝ բարձրացված բոլոր հարցերի մասով, այդ թվում նաև կազմակերպել փակ քննարկումներ. «Հենց այս դահլիճում արդյունավետ քննարկում իրականացնենք»: Ի պատասխան վարչապետ Նիկոլ Փաշինյանն ասաց, որ հիմա հենց դա են անում. «Դուք ինչ հարց ունեք, տալիս եք, մենք էլ ինչ պատասխան ունենք, տալիս ենք: Նույն հարցը անընդհատ տալիս եք, մենք էլ նույն պատասխանը անընդհատ տալիս ենք: Հիմա էլ նոր նի՞ստ, էս նոր նիստում ձեր տված հարցը և մյուս նիստում ձեր տված հարցը ինչո՞վ են տարբերվելու»:
Տեղից արձագանքեցին Ալեն Սիմոնյանն ու նրա տեղակալ Ռուբեն Ռուբինյանը։ «Համ ասում եք սուրճի սեղանի շուրջ քննարկենք, համ մեջբերում եք Սահմանադրությունից … Ինչ ֆորմատ ասեցիք, ասեցինք՝ այո»,- լկտիաբար ծաղրել է Սիմոնյանը, իսկ Ռուբինյանը հավելել է․ «Խաշ ա հասունանում»:
Ի դեպ, «Հայաստան» խմբակցության պատգամավոր Արթուր Ղազինյանը միակն էր, ով կարողացավ լռեցնել Փաշինյանին։ «Ես ցանկանում եմ, որպեսզի իրավապահ մարմինները ուշադրությամբ արձանագրեն այս վերջին հայտարարությունը, որովհետև առերևույթ առկա է «Պետական սահմանի մասին» օրենքի դրույթների խախտում, ինչը հանգեցրել է Քրեական օրենսգրքի 300.2 հոդվածին՝ տարածքային ամբողջականության դեմ ուղղված գործողություններ հոդվածի հատկանիշներով, որովհետև Վարչատարածքային բաժանման օրենքը չի կարող հիմք հանդիսանալ պետական սահմանը գծելու համար: Պետական սահմանը սահմանվում է Պետական սահմանի մասին օրենքով սահմանված ընթացակարգով, իսկ եթե չկա ճշգրտված սահման որևէ հարևան պետության հետ, պետության տարածք է հանդիսանում այն տարածքը, որի վրա գտնվում են ՀՀ զինված ուժերը, գտնվում է Հայաստանի ինքնիշխան տիրապետման տակ: Ուստի ցանկացած զիջում հնարավոր է միայն միջազգային ընթացակարգով ստորագրված, պատշաճ կարգով վավերացված միջազգային պայմանագրի հիմքով: Որևէ այլ փոփոխություն՝ կա՛մ կլինի պատերազմ, կա՛մ այլ մեխանիզմ»,- իր արձագանքում նշեց պատգամավորը:
Վարչապետի պաշտոնը զբաղեցնող անձը ընդամենը քթի տակ մրթմրթաց․ «Հաջողություն եմ մաղթում»։
Վահե Արշակյան
