ԱԺ-ն փակ քննարկում կանի սահմանների հարցով․ բարձրաստիճանները չեն բարեհաճելու գալ

Դեռևս օգոստոսի 17-ին ԱԺ «Հայաստան» խմբակցության ղեկավար Սեյրան Օհանյանն առաջարկել էր սահմանին տիրող իրավիճակի հարցի առնչությամբ փակ քննարկում կազմակերպել։ Ընդ որում, ընդդիմությունը հստակ առաջարկել էր, որ խորհրդարան գան և պատգամավորների հարցերին պատասխանեն ԱԳ և ՊՆ նախարարները, ԱԱԾ պետն ու ԶՈՒ ԳՇ պետը։ Երկու ամիս անց միայն իշխող «քաղաքացիական պայմանագիրը» բարեհաճել է ընդունել առաջարկը, այն էլ՝ մասամբ։ Խորհրդարան կգնան Զինված ուժերի գլխավոր շտաբի պետի առաջին տեղակալ Կամո Քոչունցն ու ԱԱԾ սահմանապահ զորքերի հրամանատար Արման Մարալչյանը։ Սահմանին տիրող իրավիճակի և սահմանազատման աշխատանքների առնչությամբ փակ քննարկում անցկացնելու օգտին քվեարկել են 63 պատգամավորներ, 17-ը ձեռնպահ են մնացել։

ԱԺ փոխնախագահ Ռուբեն Ռուբինյանը հայտնել է, որ պատգամավորների ընդհանուր թվի առնվազն 1/5-րդն առաջարկել է հասարակական հետաքրքրություն ներկայացնող «Հայաստանի և Ադրբեջանի շփման գծում տիրող իրավիճակը և սահմանազատման խնդիրները» թեմայով հրատապ քննարկում անցկացնել:

«Հայաստան» խմբակցության քարտուղար Արծվիկ Մինասյանը հետաքրքրվեց` արդյո՞ք արտաքին գործերի նախարարը ներկա չի լինելու նիստին, քանի որ կան մի շարք հարցեր, որոնք հենց նրա ոլորտին են առնչվում։ Ի պատասխան Ռուբինյանն ասել է, թե ընդդիմության առաջարկը փոխանցել է կառավարությանը և, ըստ էության, կառավարությունը հարկ է համարել ԱԱԾ սահմանապահ զորքերի հրամանատարին ու ԳՇ պետի տեղակալին հրավիրել ԱԺ։ Ըստ էության, իշխող ուժը բարձրաստիճան պաշտոնյաներին չի ցանկանում գործուղել խորհրդարան՝ ընդդիմության տհաճ հարցերից հեռու պահելու համար։ Փոխարենը, ԳՇ պետի տեղակալն ու ԱԱԾ Սահմանապահ զորքերի հրամանատարը չեն կարող պատասխանել քաղաքական առաջնահերթ հարցերին, որոնք կուտակվել են այս ամիսների ընթացքում։ Ընդամենը տեխնիկական բնույթի քննարկում է լինելու, իշխանությունն էլ հնարավորություն կունենա հայտարարելու, թե կատարել է ընդդիմության և հանրության պահանջը։ Եվ գառներն են ողջ, և գայլերը՝ կուշտ։

Հարություն Ադամյան