Նիկոլ Փաշինյանի թիմը ջախջախվելու է ՏԻՄ ընտրություններում

Նոյեմբերի 14-ին և դեկտեմբերի 5-ին կայանալիք ՏԻՄ ընտրություններում իշխանությունը՝ Նիկոլ Փաշինյանի գլխավորությամբ, խայտառակ պարտություն է կրելու։ Եվ պատճառը բացառապես սեփական թիմում ծավալվող ինտրիգներն են, իրար վրա «բոչկա» գլորելը, սեփական ազդեցությունն ավելացնելու համար թիմակիցներից Փաշինյանի մոտ բողոքելը։ ՔՊ մեր աղբյուրի փոխանցմամբ, այդ գործում, ի դեպ, առաջանցիկ տեմպերով հաջողել է կառավարության աշխատակազմի ղեկավար Արայիկ Հարությունյանը։ Վերջինս այսօր Նիկոլ Փաշինյանի ամենամտերիմներից է դարձել, և, այդ հանգամանքն օգտագործելով, բոլոր տեղերում իր մարդկանց է առաջ մղում։

Արայիկ Հարությունյանը խոստացել է հաղթանակ տանել Կապանում, որտեղ իր մտերիմ ընկերոջն է առաջադրել որպես քաղաքապետի թեկնածու։ Նույնիսկ թիմակիցներն են արձանագրում, որ Դավիթ Դանիելյանը որևէ շանս չունի Կապանի գործող քաղաքապետ Գևորգ Փարսյանի դեմ, և «Քաղաքացիական պայմանագիրը» խայտառակ պարտություն է կրելու։ Փաշինյանն այսօր լիովին դարձել է Արայիկ Հարությունյանի և ԱԺ փոխնախագահ Ռուբեն Ռուբինյանի ինտրիգների գերին, շարժվում է բացառապես նրանց խորհուրդներով։ ՏԻՄ ընտրություններում կուսակցական ցուցակներն էլ այդ երկուսն են գրում, թեկնածուների հետ էլ քասթինգ իրականացնում։

Հոկտեմբերի 17-ից առաջ, ի դեպ, Փաշինյանի սրտի կողմնակիցները Տիգրան Ավինյանն ու Սուրեն Պապիկյանն էին, սակայն նրանք չեն արդարացրել հույսերը։ Գյումրիում և Գորիսում կրած խայտառակ պարտություններից հետո, կարծես, Նիկոլ Փաշինյանը դասեր չի քաղել և շարունակում է նույն ոգով հարամել քաղաքական թիմը։ «Քաղաքացիական պայմանագրում» արդեն մի քանի խմբեր են ստեղծվել, որոնք իրար ավելի շատ են ատում, քան ընդդիմությանը, և հնարավորինս վնասում են իրար։ Ըստ էության, Նիկոլ Փաշինյանին այդպես էլ չհաջողվեց կուռ և համախմբված թիմ ստեղծել, զսպել կուսակիցների ախորժակն ու անառողջ նկրտումները, արդյունքում ձախողվում են բոլոր ֆրոնտներում։

Արթուր Հովսեփյան