ՊՆ հերքումները գրոշի արժեք չունեն․ Արման Թաթոյանը դարձել է գործող իշխանության թիրախը
ՎԵՐԼՈՒԾՈՒԹՅՈՒՆՆԵՐ
Հայաստանի մարդու իրավունքների պաշտպան Արման Թաթոյանը եզակի պաշտոնյաներից է, որը տիրապետում է իր գործին և պատվով է կատարում այն։ Այդ պատճառով էլ դարձել է փաշինյանական իշխանության թիվ մեկ թիրախը։ Նախօրեին պաշտպանության նախարարությունը հերքում էր տարածել՝ Գեղարքունիքի գյուղերի անմիջական հարևանությամբ ադրբեջանական զինված ուժերի ամրացման վերաբերյալ Թաթոյանի ահազանգի շուրջ։ Դրանից հետո էլ Անվտանգության խորհրդի քարտուղար Արմեն Գրիգորյանը Նվեր Մնացականյանի տաղավարում Արման Թաթոյանին հակահեղափոխական էր անվանել։
«Հեղափոխություններից հետո բազմաթիվ օղակներ հանդես են եկել որպես ընդդիմադիրներ, չնայած պետք է անաչառ լինեն՝ ՍԴ-ից սկսած, բազմաթիվ կառույցներով՝ վերջացրած: Եթե ոչ կառույցները, ապա դրանցում պաշտոն զբաղեցնող որոշ մարդիկ փորձել են հակահեղափոխական դիրքերից հանդես գալ, այդ պրոցեսը թեև ոչ ամբողջապես, բայց մեծամասամբ ավարտված է: Ձեր նշած անձին էլ մի քանի ամիս է մնացել ավելի ակնհայտ քաղաքական գործունեությամբ զբաղվելու համար»,- ասել էր Գրիգորյանը:
Մարդու իրավունքների պաշտպանը երեկ երեկոյան է ապացուցել ՊՆ տարածած սուտը, հստակ ներկայացրել ադրբեջանցիների պահվածքը Գեղարքունիքում։ Թաթոյանն արձանագրել է նաև, որ սկսվել է ՀՀ մարդու իրավունքների պաշտպանի գործունեությունը վարկաբեկող արշավ, որին միացել է նաև ԱԽ քարտուղարը:
«Պաշտպանության նախարարության վարչական ապարատի այն պաշտոնյաները, որոնք որոշում են կայացրել հոկտեմբերի 19-ին հանդես գալ ադրբեջանական զինված ուժերի անօրինական արարքների վերաբերյալ Մարդու իրավունքների պաշտպանի փաստահավաք աշխատանքների արդյունքները կասկածի տակ դնող հայտարարությամբ, պետք է միշտ հիշեն, որ Պաշտպանը երբեք չի անում հայտարարություններ, որոնք ուռճացված են կամ առավել ևս ունեն անճշտություններ: Առհասարակ, եթե Մարդու իրավունքների պաշտպանը հանդես է գալիս հրապարակային որևէ հայտարարությամբ, ուրեմն դրա համար ունի հավաստի ապացույցներ՝ ոչ թե մեկը, այլ առնվազն մի քանիսը: Ուստի, նախարարության այդ պաշտոնյաներից պահանջում ենք այլև թույլ չտալ նման անհեռատես ձևակերպումներ ՀՀ մարդու իրավունքների պաշտպանի հայտարարություններին արձագանքելիս»,- նշել է Արման Թաթոյանը:
Պաշտպանի այս հայտարարությունից հետո իրեն հարգող զինվորականը կամ բարձրաստիճան պաշտոնյան հրաժարական կներկայացներ, հրապարակային ներողություն կխնդրեր, սակայն այս իշխանությունների արժանապատվության վրա հույս դնել չարժե։ Շարքային ստախոսներ են, որոնք ընդունակ չեն ներողություն խնդրել իրենց իսկ ստերի համար։
Արթուր Ավետիսյան
