ՏԻՄ ընտրությունների արդյունքները շոկային են Նիկոլ Փաշինյանի համար․ վերադասավորումներ են անում

Հոկտեմբերի 17-ին կայացած ՏԻՄ ընտրությունները շոկային են դարձել Նիկոլ Փաշինյանի և նրա թիմի համար։ Խորհրդարանական արտահերթ ընտրություններից հետո «Քաղաքացիական պայմանագիրը» կորցրել էր իրականության զգացումն ու ամենազոր էր զգում իրեն։ Հենց դա էր պատճառը, որ ոչ մրցունակ և ապիկար թեկնածուների էին առաջադրել վեց խոշոր համայնքներում։ Արդյունքում երեք համայնքում խայտառակ պարտություն կրեցին, իսկ մի համայնքում էլ ընտրախախտումներն այնպիսի ծավալների էին հասել, որ ցնցել էին նույնիսկ սեփական կողմնակիցներին։ Պարզվեց, փաշինյանականները ոչինչ են առանց Նիկոլ Փաշինյանի, իսկ վերջինս վարկանիշ ունի միայն մի դեպքում, երբ պայքարի մեջ է մտնում նախկինների հետ։

Գորիսում ու Գյումրիում մարդիկ ընտրեցին ոչ թե իշխանության ներկայացուցչին կամ վարչական ռեսուրսը, այլ նրանց, ովքեր կարող են ինչ-որ բան անել իրենց քաղաքների համար։ «Քաղաքացիական պայմանագրում» այժմ լուրջ խմորումներ են, փորձում են պարզել պարտության պատճառները, և ավելի լավ պատրաստվել նոյեմբերի 14-ի ու դեկտեմբերի 5-ի ընտրություններին։ Մեր աղբյուրի փոխանցմամբ, կուսակցությունը, սովորության համաձայն, ոչ թե իր մեղքն է տեսնում պարտության մեջ, այլ կոնկրետ քավության նոխազներ է գտել, որոնց գլխին էլ կոտրելու են պարտությունների մեղքը։ Այդուհանդերձ, փաշինյանականները հրաշալի հասկանում են, որ Գորիսն ու Գյումրին լուրջ ազդեցություն են ունենալու մյուս ընտրությունների վրա։ Որոշ տեղերում անգամ մտադիր են փոխել իրենց թեկնածուներին, որոնք, ըստ ՔՊ վարչության, ունակ չեն հաղթելու մրցակիցներին։ Կուսակցությունում նոր ցուցակներ են գրում, հապշտապ փոփոխություններ անում, որոնց մասին առաջիկայում անպայման կհայտարարեն։ Մասնավորապես, փոփոխություններ կլինեն Վանաձորում, Վեդիում, այլ համայնքներում։ Այդ նպատակի համար նույնիսկ նախկին հանրապետականների են փորձում ներգրավել, որպեսզի նրանց միջոցով կարողանան հաղթել ՏԻՄ ընտրություններում։

Սարգիս Շահինյան