Նիկոլ Փաշինյանի իշխանությունը կազմալուծում է պատերազմի հանգամանքների հետաքննությունը

Ազգային ժողովի պաշտպանության և անվտանգության հարցերի մշտական հանձնաժողովի նիստում երեկ 8-րդ անգամ քննարկվում էր փոխնախագահի ընտրության հարցը: ԱԺ «Հայաստան» խմբակցությունը 8-րդ անգամ առաջադրել էր Արթուր Ղազինյանի թեկնածությունը: Ղազինյանը նշեց, որ ոչ մի հարցի չի պատասխանելու և եզրափակիչ ելույթ չի ունենալու, քանի որ դրանք բազմիցս արել է: Իշխանական պատգամավորներն էլ նշեցին՝ իրենց դիրքորոշումը Ղազինյանի մասով չի փոխվել: Ոչ ոք կողմ չէր, դեմ քվեարկեցին ընդդիմադիր պատգամավորները, ձեռնպահ՝ «Քաղաքացիական պայմանագրի» ներկայացուցիչները։ Քվեարկությունից հետո Անդրանիկ Քոչարյանը սպառնաց, որ արդեն փոփոխություններ են պատրաստել ԱԺ-Կանոնակարգ օրենքում, որ թույլ չտան Արթուր Ղազինյանի հետագա առաջադրումները։ Հանձնաժողովի փոխնախագահի ընտրությունը, նշենք, արդեն նույնիսկ ինտրիգից է զրկվել։

Ընդդիմությունն անում է իր սկզբունքային քայլը, իշխանականներն էլ կրկին նույն հերթապահ ելույթներն են ունենում, հապշտապ դեմ քվեարկում ու անցնում առաջ։ «Քաղաքացիական պայմանագրի» պատգամավորներն իրենք էլ են հոգնել ստեղծված իրավիճակից, սակայն կուսակցապետը հրահանգել է չընտրել Արթուր Ղազինյանին և վերջ։ Արդյունքը, բնականաբար, կանխատեսելի է։ Ի վերջո, ԱԺ պաշտպանության և անվտանգության հարցերի հանձնաժողովը արդեն ամիսներ շարունակ կազմալուծվում է Փաշինյանի պատճառով, իսկ 44-օրյա պատերազմների հանգամանքների հետաքննությունը ձգձգվում է։ Միգուցե, հենց դա է իշխող ուժի նպատակը՝ հնարավորինս հետաձգել պատերազմների հանգամանքների ուսումնասիրությունը, որը կարող է ճակատագրական լինել Նիկոլ Փաշինյանի համար։ Իհարկե, ընդդիմությանն այլ տարբերակ չեն էլ թողել, Արթուր Ղազինյանն էլ հնարավորության դեպքում կառաջադրվի 10 և ավելի անգամներ։ Խնդիրը իշխանական բուրգն է, որը վաղուց այլևս փտել և չի համապատասխանում Հայաստանի շահերին։ Եվ նույնիսկ-մեկ երկու շաբաթով հանձնաժողովի աշխատանքը հետաձգելը Փաշինյանի համար փրկօղակ է դառնում։

Սարգիս Պողոսյան