Ապօրինի գույքի բռնագանձման օրենքը՝ Փաշինյանի անձնական վրեժխնդրության գործիք

Գլխավոր դատախազությունն ավարտել և դատարան է ուղարկել ապօրինի գույքի բռնագանձման դեպքով առաջին քրգործը։ Գլխավոր դատախազությունում մեկ տարի առաջ ստեղծված վարչությունը գործը հարուցել է ԱԱԾ նախկին աշխատակից Սերոբ Հարությունյանի դեմ, դատարանից պահանջում են գնդապետից, նրա կնոջից ու որդուց բռնագանձել ընդհանուր առմամբ 485 միլիոն դրամ արժողությամբ գույք, որոնց թվում է Երևանի Հյուսիսային պողոտայում գտնվող բնակարանը, երկու ավտոկայանատեղիներ և մի քանի այլ սեփականություն։ Այս պահին դատախազությունն ուսումնասիրում է 250 անձի գույք, մոտ 10 գործ գտնվում է ավարտական փուլում։ Եվ նրանց հետ այժմ բանակցություններ են ընթանում, եթե համաձայնություն ձեռք բերվի, ապա գործերը դատարան չեն հասնի, քաղաքացիները ապօրինի համարվող իրենց գույքի 75 տոկոսը կվերադարձնեն պետությանը։ Ապօրինի ծագում ունեցող գույքի վերաբերյալ ուսումնասիրություններում կան հնչեղ անուններ, նրանց թվում՝ նախկին ոստիկանապետ Վլադիմիր Գասպարյանը, երրորդ նախագահ Սերժ Սարգսյանի եղբոր՝ հետախուզման մեջ գտնվող Լևոն Սարգսյանի դուստրը, պետական գույքի կառավարման վարչության նախկին պետ, Ազգային ժողովի նախկին նախագահ Գալուստ Սահակյանի որդին՝ Արման Սահակյանը։

Այդուհանդերձ, կարող է տարօրինակ թվալ, որ այսպիսի հնչեղ անունների թվում առաջինը գործը հարուցում են ԱԱԾ գնդապետի դեմ։ Ամենևին չենք կասկածում, որ ԱԱԾ բարձրաստիճան աշխատակիցը կարող էր ապօրինի գույք ունենալ, սակայն գործը առաջին հերթին ոչ թե ապօրինի գույք ունենալու փաստով է, այլ Նիկոլ Փաշինյանի և նրա կողմնակիցների անձնական վրեժն է։ Դեռ անցած տարվա փետրվարին մամուլում հրապարակվեց Սուրեն Պապիկյանի կողմից իր դատվածության փաստը թաքցնելու լուրը։ Նշվում էր, որ Տարածքային կառավարման և ենթակառուցվածքների նախարար Սուրեն Պապիկյանը դատվածություն է ունեցել ծառայության տարիներին և այս հագնամանքը թաքցրել է իր կենսագրությունից: Դեպքի առթիվ Հատուկ քննչական ծառայությունում քրեական գործ էր հարուցվել։ Մոտ երկու շաբաթ անց Սերոբ Հարությունյանին, ով այդ ժամանակ ԱԱԾ հակահետախուզության դեպարտամենտի իրավապահ համակարգի սպասարկման և վերահսկման բաժնի պետն էր, պաշտոնեական դիրքի չարաշահման մեղադրանք էր առաջադրվել, նրա պաշտոնավարումը ժամանակավորապես դադարեցվել էր։ Դատարանը, ի դեպ, արդարացրել էր Հարությունյանին հանցակազմի բացակայության փաստով։ Իսկ այժմ մեկ այլ գործ է հարուցվում, արդեն ապօրինի հարստացման դեպքով։ Ինչպես այս, այնպես էլ մյուս դեպքերում հստակ է լինելու, որ գործող իշխանություններն առաջնորդվելու են կամընտրական և կանխակալ, հետապնդելու են միայն ընդդիմադիրներին, իրենց դեմ երբևէ աշխատածներին։ 

Արամ Նիկողոսյան