Հրաժարվել սկզբունքներից և դառնալ խամաճիկ․ նիկոլական իշխանության թշվառությունը ակնհայտ է

Ռուսաստանի արտգործնախարար Սերգեյ Լավրովը հայտարարել է, թե Հայաստանը հետաքրքրություն է ցուցաբերում ռուսաց լեզվի դիրքերի ամրապնդման նախաձեռնության նկատմամբ։ Ելույթ ունենալով արտերկրում ապրող ռուս հայրենակիցների 7-րդ համաշխարհային կոնգրեսում՝ նա հայտնել է, որ այդ նախաձեռնության շրջանակներում Տաջիկստանում կբացվի հինգ ռուսական դպրոց, նման ծրագրեր են նախապատրաստվում Ուզբեկստանի համար։

«Վերջերս Հայաստանի նոր ղեկավարությունը հետաքրքրություն ցուցաբերեց Հայաստանի համար նույն ծրագիրը պատրաստելու հարցում», - ռուսաստանյան դիվանագիտության ղեկավարի խոսքերն է մեջբերում ՏԱՍՍ գործակալությունը։

Որևէ տարօրինակ բան չկա, որ Ռուսաստանը փորձում է ԱՊՀ տարածքում առաջ մղել ռուսաց լեզուն, որը ՌԴ քաղաքականության կարևորագույն հանգույցներից է։ Լեզվի ու լեզվամտածողության, փափուկ ուժի միջոցով կարելի է շատ ավելիին հասնել, քան զենքով ու պարտադրանքով։ Հայաստանի նախկին իշխանությունները երբեք բացահայտ չեն ընդդիմացել ՌԴ այս նկրտումներին, սակայն ներքին կյանքում խոչընդոտել են հայերենի հաշվին ռուսերենի տարածումը։ Այդ տարիներին ստեղծվեցին մի ամբողջ նախաձեռնություններ, որոնք պաստառներով պայքար էին մղում Հայաստանում ռուսական նոր դպրոցների բացման դեմ, այրում ՌԴ դրոշը դեսպանատների առջև։ Հակառուսական այդ պայքարի առաջնագծում գտնվողներից շատերը այսօր իշխանության ղեկին են, և կարծես, առանձնապես մտահոգված չեն ռուսերենի և ռուսականի այս էքսպանսիայից։ Արարատ Միրզոյանի ու Արայիկ Հարությունյանի, Հակոբ Արշակյանի ու Արսեն Թորոսյանի նկարներն այսօր էլ կարելի է գտնել որոնողական համակարգերում՝ հակառուսական որևէ ակցիայի մասնակցելիս։ Մինչդեռ այսօր բերանները ջուր են առել, որևէ կերպ չեն էլ փորձում ընդդիմանալ։ Փաստացի արձանագրենք, այս անձինք զուրկ են սկզբունքներից և արժեքներից, հանուն իշխանության պատրաստ են ծռվել օտարի առջև, թեկուզ այդ օտարը մեր ռազմավարական դաշնակիցն է։

Դանիել Հակոբյան