Փաշինյանն ինքնամոռաց շարունակում է իշխանազավթումը

Այս տարվա հոկտեմբերի 17-ին, նոյեմբերի 14-ին և դեկտեմբերի 5-ին համամասնական ընտրակարգով ՏԻՄ ընտրություններ են գրեթե բոլոր խոշոր քաղաքներում՝ բացառությամբ մայրաքաղաք Երևանի։ Նիկոլ Փաշինյանի գլխավորած վարչախումբը հետևողականորեն և ինքնամոռաց լծվել է բոլոր այդ բնակավայրերում իշխանությունը զավթելու գործընթացին։ Իշխանական պատգամավորներին գործուղում են քարոզարշավներին մասնակցելու, ընտրողներին շահագրգռելու և սեփական ապիկար թեկնածուներին փոքրիշատե դրական լույսի տակ ներկայացնելու։ Ըստ ամենայնի, փաշինյանականներին կհաջողվի համայնքների մեծ մասում սեփական համայնքապետն ու ավագանին ունենալ, և պատճառը մեկն է՝ ընդդիմության պառակտվածությունը։ Փաշինյանի իշխանությանն իրապես ընդդիմադիր քաղաքական ուժերը չուզեցին կամ չկարողացան միավորվել, քաղաքների մեծ մասում մրցունակ և հեղինակավոր թեկնածուներ ներկայացնել, առաջադրվածներն էլ անշուշտ խանգարելու են իրար։

Փաշինյանը նաև ակտիվորեն օգտագործում է կեղծ ընդդիմադիրների ծառայությունից, նրանց միջոցով աղմուկ ու խառնաշփոթ ստեղծում, հանրությանը մոլորեցնելով փորձում ազդել ընտրությունների ելքի վրա։ Առաջին փուլն արդեն վաղն է՝ Շիրակի մարզի Գյումրի, Տավուշի մարզի Դիլիջան, Սյունիքի մարզի Մեղրի, Գորիս, Տեղ և Տաթև համայնքներում։ Քարոզարշավի ողջ ընթացքում ընդդիմությանը չհաջողվեց քաղաքականացնել ընտրությունները, «Քաղաքացիական պայմանագիրն» էլ ակտիվորեն օգտագործեց վարչական բոլոր ռեսուրսները։ Միակ համայնքը, որտեղ ընդդիմությունը կարող է լուրջ մրցակցություն ապահովել, Գորիսն է։ ՔՊ-ական թեկնածուներին դիմագրավելու է «Առուշ Առուշանյան» դաշինքը՝ կալանավորված քաղաքապետի գլխավորությամբ։

Փաստենք, եթե «Քաղաքացիական պայմանագրին» հաջողվի Գորիսում էլ վերցնել իշխանությունը, ապա Փաշինյանն ու նրա սպասարկուները լրացուցիչ հնարավորություն կստանան հայտարարելու, թե Սյունիքը աջակցում է իրենց՝ անկախ հարավային մարզի նկատմամբ իրենց կատարած դավադիր գործարքներից։ Այսօր լռության օր է այդ վեց համայնքներում, իսկ վաղն արդեն ընտրողները պետք է գնան ընտրատեղամասեր։ Սյունիքի ու Տավուշի, Շիրակի մարզի ապագան կախված է գիտակից ու թասիբով ընտրողից, իսկ համայնքների ընտրությունն այլևս միայն այդ համայնքներինը չէ, որ վերաբերում է։ Հարցականի տակ է երկրի ապագան ու անվտանգությունը։ Արդյո՞ք ընդդիմությանը հաջողվել է այս փաստը հասցնել գորիսեցուն ու գյումրեցուն, մեղրեցուն և դիլիջանցուն, պարզ կլինի արդեն հոկտեմբերի 17-ին։

Արմեն Հայրապետյան