Փաշինյանը՝ քավության նոխազի փնտրտուքներում

Պաշտպանության նախկին նախարար Դավիթ Տոնոյանը երեկ հայտարարություն է տարածել՝ հատուկ նախազգուշացում անելով գործող վարչախմբի և անձամբ վարչապետի պաշտոնը զբաղեցնող Նիկոլ Փաշինյանի համար։ Ինչպես լրագրողների հետ զրույցում նշել է «Հայաստան» խմբակցության պատգամավոր Արթուր Ղազինյանը, որևէ մեկը, այդ թվում նաև գլխավոր շտաբի պետ Արտակ Դավթյանը և պաշտպանության նախկին նախարար Դավիթ Տոնոյանը ի վիճակի չէին և չէին կարող որևէ կերպ միջամտել անորակ և ժամկետանց զենքի գնման գործընթացին, եթե չլիներ գործող վարչապետ Նիկոլ Փաշինյանի թողտվությունը։ Իհարկե ստեղծված իրավիճակում Նիկոլ Փաշինյանի բազմաթիվ օգնականներ, սպասարկուներ և մանկլավիկներ կփորձեն համոզել, թե Նիկոլ Փաշինյանը տեղյակ չի եղել գործարքին՝ Հայաստանի Հանրապետությանը 4.7 միլիոն դոլար վնաս հասցնելու պայմանագրին։ Այդ դեպքում, իհարկե, յուրաքանչյուր ողջամիտ մարդ կարող է հարց տալ «իսկ ինչո՞վ էր զբաղված վարչապետի աթոռը զբաղեցնող անձը, եթե պաշտպանության նախարարի պաշտոնը զբաղեցնող Դավիթ Տոնոյանը կարողանում է նրան ֆռռացնել 4.7 միլիոն դոլարի չափով»։

Եվ յուրաքանչյուր դեպքում որևէ ողջամիտ պատասխան չեք կարող ստանալ։ Այն ինչ 2018 թ. իշխանափոխությունից հետո կատարվել է Հայաստանում, այդ թվում պետական հաստատությունների լիակատար կործանումը, տնտեսության ամբողջությամբ տորպեդահարումը, արցախյան 44-օրյա պատերազմի ընթացքում դավաճանական և ոչ կոմպետենտության պատճառով Հայաստանի զինված ուժերի պարտությունը, ունի մեկ և միակ մեղավոր պատասխանատու՝ Նիկոլ Փաշինյանը, ուրիշ որևէ մեկը դրա համար թիվ մեկ պատասխանատու չի կարող կարգվել։ Եվ այսօր ՀՀ վարչապետի պաշտոնը զբաղեցնող անձը փորձում է օգտագործել իր ստացած քվեն խորհրդարանական արտահերթ ընտրություններում, քավության նոխազներ փնտրելու, Դավիթ Տոնոյանի, Դավիթ Գալստյանի ՝ Պատրոն Դավոյի, և գլխավոր շտաբի պետի տեղակալ Ստեփան Գալստյանի գլխին կոտրելու սեփական իշխանության իրականացրած ապօրինություններն ու հանցագործությունները։ Դավիթ Տոնոյանը նախզգուշացումն արդեն արել է, առնվազն ակնկալում ենք մյուս երկուսի նախազգուշացումները։ Եվ եթե այդքանից հետո Նիկոլ Փաշինյանի իշխանությունը չգնա այդ մարդկանց դատելու ճանապարհով, ուրեմն բոլոր հստակ մեղադրանքներն ու ակնարկները ունեն իրենց հասցեատերը և հստակ պատասխանատուները։

Տիգրան Սերոբյան