Ադրբեջանն ու Թուրքիան շարունակում են հոխորտալ, իսկ Հյաաստանն իշխանություն չունի

Բելգրադում չմիացած պետությունների շարժման համաժողովը հերթական առիթն էր Ադրբեջանի նախագահ Իլհամ Ալիևի համար Հայաստանի հասցեին նոր լպիրշ արտահայտություններ անելու և սեփական՝ Նիկոլ Փաշինյանի իշխանության աջակցությամբ տարած հաղթանակը ամրագրելու համար։ Իլհամ Ալիևի խոսքով, Ադրբեջանը կարողացավ ինքնուրույնաբար ապահովել ՄԱԿ-ի անվտանգության խորհրդի Ղարաբաղի հակամարտությանը վերաբերող 4 բանաձևերի կատարումը։

«Ադրբեջանը վերջ դրեց 30 տարի շարունակվող հակամարտությանը՝ ռազմաքաղաքական միջոցներով ապահովելով իր տարածքային ամբողջականությունն ու պատմական արդարությունը։ Լեռնային Ղարաբաղի հակամարտությունը այլևս անցյալում է»,- հեռուստակամուրջի միջոցով ասել էր Իլհամ Ալիևը։ Նույն այդ համաժողովը հրաշալի առիթ էր դարձել նաև Թուրքիայի արտգործնախարար Մևլութ Չավուշօղլուի համար, որը հանդիպումներ էր ունեցել, ինչպես Ադրբեջանի արտգործնախարար Ջեյհուն Բայրամովի, այնպես էլ Ռուսաստանի արտգործնախարար Սերգեյ Լավրովի հետ՝ քննարկելով տարածաշրջանային իրավիճակը։

Հայաստանի Հանրապետությունը զարմանալիորեն որևէ կերպ չի արձագանքել նման մեղադրանքներին, իհարկե, Հայաստանը չմիացած պետությունների շարժման անդամ չէ, սակայն արտգործնախարարությունը և կառավարությունը պարտավոր էին գոնե որևէ կերպ արձագանքել նման մեղադրանքներին, մինչդեռ, մինչ այս պահը որևէ մեղադրանքի և որևէ հայտարարության արձագանք չի եղել։ Տարօրինակն այս ամբողջ պատմության մեջ այն է, որ Նիկոլ Փաշինյանի իշխանությունը շարունակում է խոնարհվել հակառակորդի առջև, մինչդեռ առիթ է փնտրում, որ իր սրտի հերսը թափի ընդդիմադիր քաղաքական ուժերի առաջ։ Հայաստանի «պողպատյա» իշխանություն ստացած վարչախումբը այս պահի դրությամբ ընդամենը Թուրքիայի և Ադրբեջանի իշխանությունների խամաճիկն է։ Եվ եթե չլիներ Վրաստանի և Իրանի պաշտոնական դիրքորոշումները, կարելի էր առնվազն անվրեպ արտահայտվել, որ Հայաստանի Հանրապետության իշխանությունները խեղճ և ձեռնասուն կենդանիներ են Ադրբեջանի նախագահ Իլհամ Ալիևի և Թուրքիայի նախագահ Ռեջեփ Թայիփ Էրդողանի ձեռքին։

Հայկ Մակարյան