Հայաստանում ծայրահեղ սուր քաղաքական պայքար է
ՔԱՂԱՔԱԿԱՆՈՒԹՅՈՒՆ
Վերջերս համացանցում քննարկվում է, որ համավարակի ու դրա դեմ պատվաստման վերաբերյալ զանգվածային լրատվության միջոցներում հրապարակվում են մանիպուլյատիվ, ապատեղեկատվություն պարունակող նյութեր։ Այս թեմայով զրուցել ենք խոսքի ազատության պաշտպանության կոմիտեի նախագահ Աշոտ Մելիքյանի հետ։
Հարցին, թե ինչպիսի՞ն է ստեղծված իրավիճակը և ի՞նչ հետևանքներ կարող են լինել մասնագետը ասել է․ «Ցավոք, մեզանում ցանկացած հարց, այդ թվում նաև՝ քովիդը, մեկնաբանվում է քաղաքական ենթատեքստով։ Երբ Հայաստանում դեռ նոր-նոր էր տարածվում համավարակը, ու կառավարությունը կայացրեց իր առաջին որոշումը, միանգամից այդ քաղաքականացված մոտեցումը երևաց և՛ ընդդիմադիր քաղաքական ուժերի ֆինանսավորման տակ գտնվող լրատվամիջոցների նյութերում, և՛ զանգվածային միջոցառումների ժամանակ այդ քաղաքական գործիչների կողմից հնչող ելույթներում, ու, կարծես թե, գլխավոր նպատակն այն էր, որ ցույց տրվեր, թե Հայաստանում քովիդի դեմ պայքարը տապալված է կամ տապալվելու է, ու որպես համեմատություն վկայակոչում էին հարևան Վրաստանի համավարակային պատկերը, սակայն, ինչպես տեսանք, Վրաստանում ևս վիճակը վատթարացավ։ Քանի որ ես էլ հիվանդացել ու բուժվել եմ, պետք է նշեմ, որ ամեն բան լավ կազմակերպված էր, ու դժգոհելու տեղ չունեմ։ Բնականաբար, նման բովանդակությամբ նյութերը բացասական հետևանքներ են ունենում։ Կարծում եմ, որ ցանկացած սրտացավ մարդ, հասարակության ու պետության մասին մտածող մարդ, հակառակը՝ պետք է խրախուսի ու աջակցի իշխանություններին, որպեսզի այդ համավարակի դեմ պայքարը հնարավորինս հաջողված լինի։ Բայց մեզ մոտ նույնիսկ այս հարցն է քաղաքականացվում ու շատ հաճախ շահարկվում է իշխանությանը հակառակվելու համար։ Այսինքն՝ ցանկացած բան, որը կարող է սպառնալիք հանդիսանալ երկրի համար, քաղաքական ուժերն ու իրենց սպասարկող լրատվամիջոցներն ուզում են օգտագործել իրենց նպատակների համար»։
Հարցին, թե բացի Հայաստանից կան արդյոք այլ երկրներ, որտեղ ևս համավարակը քաղաքականացվել է մասնագետը պատասխանել է․ «Իհարկե կա, բայց ոչ այդպիսի կատաղի, չար ու նենգությամբ, ինչպիսին Հայաստանում։ Սա բացատրվում է ծայրահեղ սուր քաղաքական պայքարով, ընդդիմության և իշխանության միջև անհանդուրժողականությամբ։ Սա մի պայքար է, որտեղ խտրականություն չի դրվում միջոցների միջև, ուղղակի պետք է ոչնչացնել հակառակորդին, ու այդ պարագայում, նաև այս թեմայով մանիպուլյացիաներն ու կեղծ լուրերը նենգ են, չար, որոնք ամենևին էլ չեն բխում պետության կամ հասարակության շահերից»։
Սոնա Գիշյան
